त्रिभुवन विश्वविद्यालयको उपकुलपतिमा प्रा.डा केशरजंग बराल नियुक्त भएका छन्।
कुलपति समेत रहेका प्रधानमन्त्री पुष्पकमल दाहाल प्रचण्डले बिहीबार बराललाई विश्वविद्यालयको २०औं उपकुलपतिमा नियुक्त गरेको प्रधानमन्त्रीका निजी सचिवालय सदस्य विनोद न्यौपनेले राससलाई जानकारी दिए।
सिफारिस गरिएका तीन जनामध्ये बराललाई प्रधानमन्त्री प्रचण्डले नियुक्त गरेका हुन्। केशरजंग बराल पोखरा विश्वविद्यालयका पूर्वउपकुलपति हुन्।
सहकुलपति समेत रहेका शिक्षामन्त्री अशोक राई नेतृत्वको उपकुलपति छनोट तथा सिफारिस समितिले बरालसँगै प्रा.डा चित्रबहादुर बुढाथोकी र प्रा.डा टंकनाथ धमलाको पनि नाम सिफारिस भएको थियो।
उपकुलपतिका लागि ४३ जनाले आवेदन दिएकामा 'सर्टलिस्ट' मा १४ जना परेका थिए। तीमध्ये तीन जनाको नाम कुलपति समेत रहेका प्रधानमन्त्री पुष्पकमल दाहाल 'प्रचण्ड' लाई आइतबार सिफारिस गरिएको थियो।
