उपप्रधान तथा गृहमन्त्री रवि लामिछानेले सरकारले व्यक्ति केन्द्रित नभइ विषयमा केन्द्रित भएर सहकारी समस्याको समाधान गर्ने बताएका छन्।
नयाँ बानेश्वरस्थित संसद् भवन बाहिर सोमबार सञ्चारकर्मीसँग कुराकानी गर्दै गृहमन्त्री लामिछानेले सहकारी पीडितहरूको न्यायका लागि सरकारले द्रुत गतिमा काम गर्ने बताएका हुन्।
‘सहकारी पीडितहरूको न्यायका लागि द्रुत गतिमा काम गर्छ। प्रमुख प्रतिपक्षी दलले व्यक्ति केन्द्रित भएर जुन अहिले नाराबाजी लगाइरहेको छ। हामी व्यक्ति केन्द्रित नभइ विषयमा केन्द्रित भएर यो समस्या समाधान गर्नतिर लाग्छ,’ उनले भने।
सहकारीको बचत अपचलनमा गृहमन्त्रीकै संलग्नता रहेको भन्दै छानबिनका लागि प्रमुख प्रतिपक्षी नेपाली कांग्रेसले संसदीय समिति गठनको माग गरेको छ। सत्तापक्ष र प्रतिपक्षीबीच समिति गठन गर्ने विषयमा सैद्धान्तिक सहमति पनि जुटेको थियो। तर कार्यादेश टुंगो नलाग्दा समिति गठनले पूर्णता पाउन सकेको छैन।
