नेकपा (एकीकृत समाजवादी) को सचिवालय बैठकले सरकारले ल्याएको अध्यादेशको विरोध गर्ने निर्णय गरेको छ।
केन्द्रीय कार्यालय आलोकनगरमा बिहीबार बसेको बैठकले सरकारले हालै ल्याएका ६ वटा अध्यादेशको विरोध गर्ने निर्णय गरेको उपमहासचिव रामकुमार भट्टराईले बताए।
‘सरकारले ल्याएको अध्यादेशमा कालोबजार ऐनलाई तोडमोडल गर्यो। २० प्रतिशतभन्दा बढी नाफा खान नपाउने ऐन खारेज गर्नेबित्तिकै बजारमा सिमेन्टको मूल्य उच्च रूपमा बढेको छ,’ उनले भने, ‘मुठिभर व्यक्ति र व्यवसायीहरूको लागि सरकार लागि परेको हुनाले त्यसको विरुद्धमा पार्टी जानुपर्छ भनेर लागेको छ।’
सरकारले ल्याएको अध्यादेशको सदन र सडक दुवैबाट विरोध गर्ने पनि उनले बताए।
सरकारले संरक्षित क्षेत्रका जमिनसमेत सरकारको नाममा ल्याएर त्यो जग्गालाई व्यक्ति, समूह र उद्योगलाई दिने र गिरीबन्धु जस्ता जग्गालाई वैध बनाउने काम गर्न खोजेकोले विरोध गर्नु परेको उनको भनाइ छ।
(न्युज एजेन्सी नेपाल)
