जनता समाजवादी पार्टी नेपालका अध्यक्ष उपेन्द्र यादवले आफूहरूको सहमतिबिना भूमिसम्बन्धी अध्यादेश अघि नबढ्ने ब्रिफिङ गरेका छन्।
बुधबारको पार्टी संसदीय दल बैठकमा अध्यक्ष यादवले प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवासँग गत आइतबार बालुवाटारमा भएको छलफलबारे ब्रिफिङ गरेका हुन्।
‘भूमिसम्बन्धी अध्यादेश तपाईंहरूको सहमति बेगर अघि बढाउँदैनौँ भनेर प्रधानमन्त्री सहितका नेताहरूले भन्नुभएको छ,’ अध्यक्ष यादवले संसदीय दलमा गरेको ब्रिफिङ सुनाउँदै सांसद राजकिशोर यादवले भने, ‘अघि नबढाउने भनेको फिर्ता सरह नै हो भनेर अध्यक्षले ब्रिफिङ गर्नुभयो।’
सरकारले सहकारीसहिच पाँच वटा अध्यादेश बुधबारको प्रतिनिधि सभा बैठकमा निर्णयार्थ पेस गरेको छ भने भूमिसम्बन्धी अध्यादेश निर्णयार्थ पेस भएको छैन।
जसपा नेपालले सहकारीसहित सरकारले ल्याएका पाँच अध्यादेश स्वीकार गर्ने निर्णयसमेत गरेको छ। तर भूमिसम्बन्धी अध्यादेश फिर्ता लिनुपर्ने उसको माग छ।
प्रतिनिधि सभामा कांग्रेस र एमालेको मात्रै पनि बहुमत छ र अध्यादेश स्वीकार गर्न अप्ठेरो थिएन। तर राष्ट्रिय सभामा ३ जना सांसद भएको जसपा नेपालको साथ सरकारलाई आवश्यक छ।
यो पनि: पाँच अध्यादेश समर्थन गर्ने जसपा नेपालको निर्णय
