नेकपा एमाले मोरङको नयाँ नेतृत्व चयनका लागि बुधबार भएको निर्वाचनको मतगणना बिहीबार बिहानबाट हुने भएको छ।
बुधबार भएको मतदानमा ८८८ मत खसेको थियो।
'बिहीबार बिहान ९ बजेबाट मतगणना थाल्ने सहमति भएको छ,' प्रमुख निर्वाचन अधिकृत सुरेशलाल श्रेष्ठले भने।
निर्वाचन कमिटीले दिएको जानकारी अनुसार ९११ प्रतिनिधिहरूमध्ये ८८८ जनाले मतदान गरेका छन्।
१६५ सदस्यीय नयाँ जिल्ला कमिटी चयनका लागि बिहान साढे नौ बजेदेखि मतदान भएको थियो। मतदान कार्य साँझ पौने ८ सम्म चलेको थियो।
विराटनगरमा जारी एमाले मोरङको १० औं अधिवेशनमा राजकुमार ओझा र अजम्बर राईको नेतृत्वमा दुइटा प्यानलले उम्मेदवारी दिएका छन्।
अध्यक्षका दुई उम्मेदवारमध्ये प्रदेश पूर्वसांसद ओझाले संस्थापन पक्षको प्रतिनिधित्व गर्छन्। उनलाई कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ।
अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ।
