पूर्वाधार विकास समितिका सभापति दीपकबहादुर सिंहले जलस्रोत विधेयक अबको दुई हप्ता भित्रमा सदनमा पेस गर्ने बताएका छन्।
बिहीबार काठमाडौंमा आयोजित ‘नेपालमा प्रभावकारी सुशासनका लागि एकीकृत नदी वेसिन योजना र व्यवस्थापन’ विषयक कार्यशालामा बोल्दै सभापति सिंहले यस्तो बताएका हुन्।
उनले विधेयकमा मोटामोटी सहमति भइसके पनि केही कुरामा सहमति जुटाउन बाँकी रहेको उल्लेख गर्दै अबको दुई हप्ताभित्र सदनमा पेस गर्ने बताए।
उनले उर्जा विधेयकलाई समेत सेयरधनी नेपालीको हक र हित हुनेगरी ल्याउने प्रतिबद्धता व्यक्त गरे।
उनले अहिलेका शासकहरूले पानीको महत्व नबुझेको कारण मानव निर्मित तालतलैयाहरू सुक्दै गएको बताए।
मानव निर्मित तालहरूको पानी सुख्खायाममा जहाँ पनि प्रयोग गर्दा सजिलो हुने भए पनि त्यसतर्फ सरकारले ध्यान नदिएको उनको भनाइ छ।
उनले भने, ‘जलस्रोत विधेयक र ऊर्जा विधेयक पूर्वाधार विकास समितिमा आएको छ। पहिला ऊर्जा विधेयक आयो त्यसपछि जलस्रोत विधेयक आयो। जलस्रोत विधेयकमा हामी दुई चार वटा कुराहरूमा हामी अड्किएका छौं। तर केही समयमा हामी आपसमा छलफल गरेर सबैको सल्लाह सुझावलाई लिएर छिटोभन्दा छिटो अगाडि बढाउन गइराखेका छौं। सदनमो पेस गर्न गइरहेका छौं। त्यो विधेयक हामीले यस्तो बनाउनुपर्छ जुन विधेयक राष्ट्रहित होस्। जुन विधेयक जनहित होस्। यस विधेयकले सेयर लिएका नेपाली जनताको हक र हितमा होस् भन्ने कारणले र सेक्टरमा भएका साथीहरू र विज्ञहरूसँग पनि गहिरो डिसकसन गरेपछि मात्र हामी अगाडि बढ्नको लागि तयार हुन्छौं। अब जलस्रोत विधेयक सदनमा पेस गर्न दुई हप्ता पनि लाग्दैन। अहिलेका शासकहरूले पानीको महत्व बुझेका छैनन्। उपत्यकामा पनि मान्छेबाट निर्मित तालतलैयाहरू सयौं हजारौंको संख्यामा थियो। मान्छेले त्यो निर्मित गर्दाखेरी मान्छेले रोजगारी पाउँथ्यो। त्यो पानी ड्राइ सिजनको बेला जहाँ पनि प्रयोग गर्न सकिन्थ्यो। तर त्यो सबै विनाश भएर गयो।’
सभापति सिंहले जंगल मासिँदै गएपनि पानीका स्रोतहरू समेत सुक्दै गएको कारण वन जंगलको संरक्षणमा सबैले जिम्मेवार हुन आवश्यक रहेको बताए।—न्युज एजेन्सी नेपाल
