हामी नेपालका संयोजक सुदन गुरूङले आफूले गगन थापासँग भेटेर 'बूढा नेताहरूलाई अब आउन दिनु हुन्न' भनेको बताएका छन्।
संविधान दिवसको दिन राष्ट्रपति निवासमा आयोजित कार्यक्रममा सहभागी हुन जानुको कारणबारे भिडिओ प्रस्टीकरण दिँदै उनले उक्त जानकारी गराएका हुन्। उनले उक्त भिडिओ शनिबार आफ्नो फेसबुक पेजमा राखेका थिए।
'मैले गगन दाइलाई पनि भेटेँ। यस्तो तालले भएन दाइ, तपाईंहरू के के गर्ने हो गर्नू, तर यी बूढाहरूलाई अब आउन दिनुभएन,' उनले भने।
नेपाली कांग्रेसका महामन्त्री थापासँगको भेटमा सुदनले अहिलेको संविधानले नै नेताहरूलाई संरक्षण गरेको पनि बताएका थिए।
उनले भने, 'नेताहरूलाई संवधानले संरक्षण गरेको हो अहिलेसम्म। त्यतिखेर संविधान खारेज गरेको भए राष्ट्रपति पनि जान्थ्यो। राष्ट्रपति गएपछि देश अभिभावकविहीन हुन्थ्यो। उता इन्डियातिर सबै जना रेडीमा छ भन्ने सुन्नमा आयो। त्यसैले संविधान खारेज गर्नु हुन्न।'
'संविधान खारेज गर्नेबित्तिकै जुनसुकै बेला जे पनि हुनसक्छ,' उनले अगाडि भने, 'मसँग कुनै विकल्प थिएन। जम्मा १५ मिनेट थियो, निर्णय गर्न। तपाईंहरूको भविष्य के गर्ने भनेर निर्णय गर्न।'
उनले आफ्नो भिडिओ सन्देशमा नेताहरूले शिर उठाएर हिँड्न नसकोस् भनेर आफू शीतल निवास गएको बताएका छन्।
'त्यहाँ मलाई चिया खानू भनेको थियो। मैले चिया खाइनँ। पानी खानू भनेको थियो, पानी पनि खाइनँ। नेताहरूसँग कुर्सीमा बस्दा पनि बसिनँ। बाहिर पानीमा रूझेरै बसेँ,' उनले भने।
-1758281038.jpeg)
-1758107792.jpg)
-1758342751.jpg)
-1746513231.jpg)
-1746009348.jpg)
