नेकपा (एमाले) का अध्यक्ष केपी शर्मा ओली भक्तपुरको गुण्डुस्थित नयाँ घरमा धेरै कार्यकर्तामाझ पहिलो पटक सार्वजनिक भएका छन्।
अध्यक्ष ओलीले मंगलबार पाेलिटब्युरो सदस्य महेश बस्नेतसहित युवा संघका पूर्व र वर्तमान पदाधिकारीसँग सामूहिक भेट गरेका हुन्।
भदौ २४ गते पछि सैनिक सुरक्षामा रहेका ओली गत सातादेखि भक्तपुरको गुण्डुमा सरेका हुन्।
गुण्डु डेरामा सरेको भोलिपल्टदेखि उनले पार्टीका नेताहरूलाई बाेलाएर एक्लाएक्लै भेटवार्ता गरिरहेका थिए।
उनले वरिष्ठ उपाध्यक्ष ईश्वर पोखरेल, उपाध्यक्षहरू महासचिव शंकर पोखरेललगायत पदाधिकारीहरूसँग भेटघाट गरिरहेका छन्। केही सचिवहरूलाई मंगलबार भेटका लागि बोलाएका छन्।
बालकोटस्थित उनको निवासमा प्रदर्शनकारीले आगजनी गरेका थिए। बालकोटमा एउटै कम्पाउण्डमा उनको दुइटा घर थियो।
गुण्डुमा उनले एमालेका नेता कार्यकर्तासँग भेटघाट बढाएका छन्।
मंगलबार बाहिरिएको भिडिओमा पनि उनले कार्यकर्तासँग भेटघाट गरिरहेको देखिन्छ। उनले कार्यकर्तासँग फोटोसमेत खिचाएका छन्।
यद्यपि भिडिओमा कसैसँग कुराकानी गरेको भने देखिँदैन। ओलीसँग केही नेता तथा कार्यकर्ताहरू गएर भेटेका थिए। तर धेरै जना एकसाथ उनको निवासमा पुगेका थिएनन्। मंगलबार भने कार्यकर्ताहरू एकसाथ उनलाई भेट्न गुण्डु पुगेका थिए।
जेन–जी विद्रोह चर्किएपछि उनले २४ गते प्रधानमन्त्रीबाट राजीनामा दिएका थिए। लगत्तै उनलाई सेनाले हेलिकोप्टरमार्फत् शिवपुरी पुर्याएको थियो।
-1746009348.jpg)
