जेनजी आन्दोलनका क्रममा प्रदेश सभाको सचिवालय र बैठक भवन ध्वस्त बनेपछि कोशी सरकारले सभाको चालु अधिवेशन अन्त्य गरेको छ।
शुक्रबार बसेको प्रदेश मन्त्रिपरिषद् बैठकले शुक्रबार राति १२ बजेबाट प्रदेश सभाको चालु सातौं अधिवेशन अन्त्य गर्ने निर्णय गरेको आन्तरिक मामिला तथा कानुन मन्त्री रेवतीरमण भण्डारीले जानकारी दिएका छन्।
सभा हल र सचिवालय नहुँदा प्रदेश सभाको बैठक बस्नै नसक्ने अवस्था छ। सभाका लागि वैकल्पिक स्थानको खोजी जारी रहेको सरकारको भनाइ छ।
मन्त्रिपरिषद्को निर्णय अनुसार प्रदेश प्रमुख परशुराम खापुङ्गले प्रदेश सभाको बैठक अन्त्य भएको जानकारी प्रदेश सभालाई दिनेछन्।
भदौ २४ को तोडफोड, लुटपाट र आगजनीले भग्न कोशी प्रदेशसभा भवनमा तत्कालै संसदीय गतिविधिको सम्भावना नरहेको सचिवालयले जनाएको छ।
तत्कालीन जिल्ला विकास समितिको भवनमा रहेको प्रदेशसभा सचिवालय भवन अब काम नलाग्ने भइसकेको प्राविधिक जाँचले देखाएको छ। यसका बाबजुद मिडिया सेन्टरको एउटा कोठाबाट सचिवालयको काम सुरू भइसकेको छ।
यसरी काम सुरू भएको साता दिनसम्म पनि प्रदेश सभा भने सुरक्षाकर्मीविहीन अवस्थामा छ।
कार्यालयको सुरक्षाप्रति चिन्तित कर्मचारीहरूले कर्मचारीले थपे हिंसात्मक घटना भएको यतिका दिन बितिसक्दा पनि प्रहरी आइनपुगेको गुनासो गरेका छन्।
‘दिउँसो न राति, प्रहरी उपस्थिति प्रदेश सभामा छैन। यसले अलिअलि बचेको र लुटपछि पनि फिर्ता आएका सामानको सुरक्षा चुनौतीपूर्ण भयो,’ प्रदेशसभा सचिवालयका एक उच्च अधिकारीले भने।
प्रदेश सभामा प्रहरी निरीक्षकको नेतृत्वमा ३५ जना प्रहरी टोली यसअघि परिचालित थियो।
संसद चल्दा मर्यादापालकका रूपमा उनीहरूले प्रदेश सभाको सुरक्षा गर्दै आएका थिए। तर, जेनजी आन्दोलनका क्रममा भदौ २४ मा भवनमा आगजनी भएपछि त्यही टोली पनि प्रदेशसभा भवन परिसरबाट गायब जस्तै छ।
‘अहिले जम्मा एक जना गार्डको भरमा प्रदेश सभा भवनको सुरक्षा गर्नुपरेको छ’, सचिवालयका एक कर्मचारीले भने, ‘प्रहरीलाई पटक–पटक टोली पठाउन आग्रह गर्दा पनि सुनुवाइ भएन।’
प्रदेश सभाका अनुसार भदौ २४ को घटनापछिका हरेकजसो रात कोही न कोही व्यक्तिहरू प्रदेश सभाभित्र प्रवेश गर्ने, लुटपाटको प्रयास गर्ने काम भइरहेको छ।
सुरक्षा गार्डको चनाखोपनले अहिलेसम्म कुनै अप्रिय घटना नभएको उनीहरू बताउँछन्।
‘भवन जलेको हो, प्रदेश संरचना जलेको छैन। प्रदेशको सबैभन्दा ठूलो जननिर्वाचित निकायको सुरक्षामा प्रहरीले किन यस्तो खेलाँची गरेको हो बुझ्न सकिएन,’ ती कर्मचारी थप्छन्, ‘कर्मचारी तहबाट मात्रै होइन राजनीतिक तहबाट आग्रह गर्दा पनि प्रहरी टोली परिचालित हुन सकेको छैन।’
सभामुख अम्बरबहादुर विष्टले कोशीका डिआइजी ईश्वर कार्कीलाई फोन गरेर प्रहरी परिचालन गरिदिन आग्रह गरेका थिए। उनको आग्रहका बाबजुद प्रदेश सभामा प्रहरी परिचालन भएको छैन ।
मोरङ प्रहरी प्रमुख एसपी कवित कट्वालले प्रदेश सभाभित्र प्रहरी बस्ने ठाउँ अभावले बाहिरबाटै प्रहरीले सुरक्षा दिइरहेको बताए।
‘परिचालन हुँदै नभएको होइन, भित्र बस्ने ठाउँ अभावले नजिकै अर्को ठाउँमा बसेर नियमित सुरक्षा दिइरहेका छौं,’ उनले भने। यद्यपि प्रदेश सभाका कर्मचारीहरू भने दिउँसो र राति प्रहरी गस्ती वा टोली आफूहरूले नदेखेको बताउँछन्।
भदौ २४ को आगजनीबाट प्रदेश सभाको बैठक बस्ने सभा हल र सचिवालय जलेको थियो। सचिवालयको तीन तले भवनको पहिलो तला पूर्ण रूपमा क्षति भएको छ। दोस्रो तलाको केही भाग पूर्ण रूपमा क्षति भएको छ।
विषयगत समितिका सभापतिहरूको कार्यकक्षसहित दुईवटा मिनी हल रहेको तेस्रो तलामा भने केही कम क्षति भएपनि पुरानो भवन भएकोले पुनः सन्चालन गर्न असम्भव रहेको प्राविधिकहरुले बताएका छन्।
ज्यादै पुरानो भवनलाई आगोको लप्काले कमजोर बनाइदिएका कारण इन्जिनियरहरूले बस्न नमिल्ने भनिसकेका छन्।
आगजनीबाट कोशी प्रदेश सचिवालयका ८ वटा चार चक्के गाडी, ११ वटा मोटरसाइकल र २ वटा स्कुटर पूर्ण रूपमा जलेर नष्ट भएका थिए। सचिवालयका कर्मचारी र प्रहरीका गरी थप ८ वटा निजी नम्बर प्लेटका मोटरसाइकल र स्कुटर समेत जलेका थिए।
-1746009348.jpg)
