क्रिकेटको मैदानमा जित र हारको फैसला हुन्छ। खेलाडीहरू जितको खुसी वा हारको पीडा बोकेर घर फर्किन्छन्। तर कहिलेकाहीँ मैदानबाट यस्तो मान्छे पनि फर्किन्छ, जसले न कुनै रन बनाएको हुन्छ, न विकेट लिएको हुन्छ।
तैपनि उसले हजारौं दर्शकको माया कमाएको हुन्छ।
नेपाल प्रिमियर लिग (एनपिएल) को तेस्रो संस्करण सकिएपछि स्वदेश फर्किएकी येशा सागर त्यस्तै एक पात्र हुन्।
काठमाडौंको त्रिभुवन अन्तर्राष्ट्रिय विमानस्थलबाट बिदा हुँदै गर्दा उनको साथमा एउटा सुटकेस थियो। अनुहारमा मुस्कान थियो। अनि नेपाली क्रिकेटसँग जोडिएका थुप्रै सम्झना थिए।
भारतको पञ्जाबमा जन्मिएर क्यानडामा हुर्किएको आफ्नो व्यावसायिक जीवनलाई अन्तर्राष्ट्रिय क्रिकेटसम्म पुर्याएकी येशाका लागि नेपालको यो बसाइ अर्को एउटा प्रतियोगितामा काम गरेको अनुभव मात्र रहेन।
नेपाली दर्शकको क्रिकेटप्रतिको लगाव, कीर्तिपुरको मैदानमा देखिने उत्साह र यहाँ पाएको आत्मीयताले उनलाई छोएको देखिन्छ।
तर क्रिकेट मैदानमा माइक समातेर खेलाडीसँग कुरा गर्ने, दर्शकको उत्साहलाई प्रत्यक्ष प्रसारणमार्फत संसारभर पुर्याउने यी युवतीको आफ्नै कथा पनि कम रोचक छैन।
उनको यात्रा क्रिकेट मैदानबाट सुरू भएको थिएन।
रेस्टुरेन्टमा काम गर्दै पढ्ने एक अन्तर्राष्ट्रिय विद्यार्थीबाट सुरू भएको त्यो यात्रा म्युजिक भिडिओ, मोडलिङ र अभिनय हुँदै क्रिकेटको मैदानसम्म आइपुगेको हो।

पढाइ खर्च जुटाउन रेस्टुरेन्टमा काम
येशा सन् १९९६ डिसेम्बर १४ मा भारतको पञ्जाबस्थित लुधियानामा जन्मिएकी हुन्।
भारतमा स्नातक तहको पढाइ सकेपछि उनी सन् २०१५ को डिसेम्बरमा थप अध्ययनका लागि क्यानडा पुगिन्। त्यति बेला उनी १९ वर्षकी थिइन्।
विदेशमा नयाँ जीवन सुरू गर्नु सजिलो थिएन। टोरन्टोस्थित सेनेका कलेजमा अध्ययन गर्दा उनलाई आफ्नो खर्च जुटाउने चुनौती थियो। त्यसैले पढाइसँगै रेस्टुरेन्टमा काम गरिन्।
क्यानडामा अध्ययन गर्ने अरू थुप्रै अन्तर्राष्ट्रिय विद्यार्थीजस्तै उनका दिन पनि पढाइ, काम र भविष्यको खोजीमा बित्थे। तर त्यही व्यस्त जीवनबीच एउटा अवसर आयो, जसले उनको व्यावसायिक यात्रालाई अर्कै दिशामा मोडिदियो।
सन् २०१७ मा उनका एक पूर्वसहपाठीले म्युजिक भिडिओमा अभिनय गर्ने प्रस्ताव राखे।
येशाले स्वीकार गरिन्।
'जमाने' बोलको पञ्जाबी गीतको म्युजिक भिडिओबाट उनले मनोरञ्जन क्षेत्रमा पाइला राखिन्। त्यसपछि एकपछि अर्को अवसर आउन थाले।
उनले गिप्पी ग्रेवाल, पर्मिस बर्मा र टोनी कक्कडजस्ता कलाकारसँग काम गरिन्। पञ्जाबी, हिन्दी र तेलुगुसहित विभिन्न भाषाका ३० भन्दा बढी म्युजिक भिडिओमा अभिनय गरिन्।
सन् २०२३ मा पञ्जाबी चलचित्र 'यारां दा रूतबा' मा पनि देखिइन्।
मोडलिङ र अभिनयसँगै फिटनेससम्बन्धी सामग्रीमार्फत सामाजिक सञ्जालमा पनि आफ्नो पहिचान बनाउँदै गइन्। तर येशाको व्यावसायिक यात्राले फेरि अर्को मोड लियो।
यसपालि उनलाई क्यामराअगाडि अभिनय मात्र गर्नु थिएन। खेलाडीसँग कुरा गर्नु थियो। मैदानमा भइरहेको खेललाई बुझेर दर्शकसम्म पुर्याउनु थियो। त्यो पनि प्रत्यक्ष प्रसारणमा।
उनले क्रिकेट प्रस्तोताका रूपमा काम गर्न थालिन्।
म्युजिक भिडिओबाट क्रिकेट मैदानसम्म
संगीतको भिडिओ र क्रिकेटको प्रत्यक्ष प्रसारणमा एउटा ठूलो भिन्नता हुन्छ।
म्युजिक भिडिओमा दृश्य मन नपरे फेरि खिच्न सकिन्छ। संवाद बिग्रिए अर्को टेक लिन सकिन्छ। तर क्रिकेटको मैदानमा त्यस्तो सुविधा हुँदैन।
खेलाडीले चौका हानेपछि उनको प्रतिक्रिया त्यही क्षण लिनुपर्छ। खेल सकिनेबित्तिकै जित्ने टोलीको खुसी र हार्ने टोलीको निराशाबीच उपयुक्त प्रश्न सोध्नुपर्छ।
कहिलेकाहीँ दर्शकको चर्को हुटिङबीच बोल्नुपर्छ। कहिलेकाहीँ केही सेकेन्डभित्रै खेलको प्रसंग बुझाएर अर्को कार्यक्रममा जानुपर्छ।
येशाले यही चुनौतीपूर्ण संसार रोजिन्।
क्यानडाको ग्लोबल टी–२० क्रिकेट प्रतियोगिता उनको प्रस्तुतिकला चिनिने महत्त्वपूर्ण मञ्च बन्यो।
त्यसपछि उनले बंगलादेश प्रिमियर लिग, भारतको विभिन्न टी–२० प्रतियोगिता र महिला प्रिमियर लिगजस्ता प्रतियोगितामा काम गरिन्।
अंग्रेजी, हिन्दी र पञ्जाबी भाषामा संवाद गर्न सक्ने क्षमताले पनि उनलाई फरक देशका खेलाडी र दर्शकसँग जोडिन सहयोग पुर्यायो।
यसरी भारतको लुधियानाबाट क्यानडाको टोरन्टो पुगेकी येशाको व्यावसायिक यात्रा अन्तर्राष्ट्रिय क्रिकेटका विभिन्न मैदान हुँदै नेपालसम्म आइपुग्यो।
-1795345877.jpg)
कीर्तिपुरमा भेटिएको नेपाली क्रिकेटको प्रेम
गत असोजमा एनपिएलले तेस्रो संस्करणका लागि येशा सागरलाई प्रस्तोताका रूपमा ल्याउने घोषणा गर्यो।
अघिल्लो संस्करणमा जेस क्रोको प्रस्तुतिसँग परिचित नेपाली दर्शकका लागि येशा नयाँ अनुहार थिइन्।
तर उनी नेपाली क्रिकेटबारे बिल्कुलै अनभिज्ञ थिइनन्।
नेपाल आउनुअघि नै यहाँका क्रिकेट समर्थकको उत्साहबारे सुनेकी उनले नेपाली दर्शकसँग भेट्न आफू उत्साहित रहेको बताएकी थिइन्।
उनलाई नेपालका स्थानीय परिकार चाख्ने र यहाँको संस्कृतिबारे बुझ्ने पनि रहर थियो।
कात्तिक ९ गते कीर्तिपुरको त्रिवि अन्तर्राष्ट्रिय क्रिकेट मैदानमा एनपिएलको तेस्रो संस्करण सुरू भयो। त्यसपछि करिब चार साता मैदानमा खेलाडीहरूको प्रतिस्पर्धा चलिरह्यो। दर्शकदीर्घामा आआफ्ना टोलीका समर्थकको उत्साह देखिइरह्यो।
येशा त्यही उत्सवको एउटा हिस्सा बनिन्।
येशा त्यही क्रिकेट उत्सवको एउटा हिस्सा बनिन्।
लाइभ प्रसारणको एङ्करिङ होस् वा लुम्बिनी लायन्स र पोखरा एभेन्जर्सजस्ता टोलीका खेल क्रममा बाउन्ड्री लाइनबाट खेलाडीसँग गरिएका प्रत्यक्ष कुराकानी, येशाले मैदानभित्रको रोमाञ्च र दर्शकदीर्घाको उत्साहलाई जोडिरहिन्।
उनको काम खेलाडीलाई प्रश्न सोध्नु र खेलका गतिविधि प्रस्तुत गर्नु मात्र थिएन। मैदानमा भइरहेको प्रतिस्पर्धासँगै नेपाली दर्शकको भावना र उत्साहलाई पनि प्रसारणमार्फत प्रस्तुत गर्नु थियो।
येशाले नेपाली दर्शकको त्यही ऊर्जासँग आफ्नो प्रस्तुतिलाई सहजै मिसाइन्।
नेपालमा क्रिकेट केवल मैदानभित्र खेलिने खेलमा सीमित छैन। यो हजारौं दर्शकको साझा उत्साह बनिसकेको छ। येशाका लागि एनपिएल नेपाली क्रिकेटको त्यही उत्साहलाई नजिकबाट अनुभव गर्ने अवसर बन्यो।
अझ उनले एनपिएलको फाइनलमा नेपालीपन झल्कने पहिरन लगाएर पनि मन जितिन्। उनले ढाकाको ब्लाउज र सारी लगाएर एनपिएल फाइनलको प्रस्तुति दिएकी थिइन्।

नेपालबाट फर्किँदा बोकेका सम्झना
विश्व क्रिकेटमा नेपाली समर्थकको निःस्वार्थ प्रेम र उत्साह सधैं चर्चाको विषय बन्ने गर्छ।
नेपालमा खेल्न आएका विदेशी खेलाडी हुन् वा प्रतियोगिता सञ्चालन गर्न आएका प्राविधिक र प्रस्तोता, यहाँका दर्शकको क्रिकेटप्रतिको लगावले उनीहरूलाई कुनै न कुनै रूपमा प्रभावित पार्ने गरेको छ।
येशाले पनि यसपालि नेपाली क्रिकेटको त्यही आत्मीयता नजिकबाट अनुभव गर्ने अवसर पाइन्।
करिब एक महिना कीर्तिपुरको मैदानमा बिताउँदा उनले खेलाडीहरूको जितको खुसी र हारको निराशा मात्र देखिनन्। दर्शकदीर्घामा गुञ्जिने हुटिङ, आफ्नो टोलीलाई जिताउन समर्थकहरूले देखाउने उत्साह र क्रिकेटप्रति नेपालीहरूको गहिरो लगाव पनि महसुस गरिन्।
एनपिएलको तेस्रो संस्करण सकिएसँगै उनको नेपाल बसाइ पनि टुंगिएको छ। अब उनी अर्को कुनै देशको अर्को क्रिकेट मैदानमा माइक समातेर उभिनेछिन्। त्यहाँ पनि खेलाडीहरूसँग कुरा गर्नेछिन्। दर्शकलाई खेलको रोमाञ्च सुनाउनेछिन्। व्यावसायिक जीवनको यो यात्रा यसरी नै अघि बढिरहनेछ।
तर उनको यात्रामा नेपाल अब एउटा सम्झना बनेर जोडिएको छ।
क्रिकेटमा सबैले उपाधि जित्दैनन्। सबैले रन बनाउँदैनन्। सबैले विकेट पनि लिँदैनन्।
कहिलेकाहीँ मैदानमा नखेली पनि कसैले दर्शकको मन जित्छ।
येशा सागर नेपाली क्रिकेटको माया जितेर फर्किएकी छन्।
***