नयाँ गठन भएको गतिशील लोकतान्त्रिक पार्टी (गतिलो) ले मुलुकको आर्थिक समृद्धिसँगै रोजगारी वृद्धिका लागि विभिन्न एजेन्डा केन्द्रित आफ्नो पहिलो अवधारणा सार्वजनिक गरेको छ।
केही दिन पहिले मात्रै बुद्ध एयरका कार्यकारी अध्यक्ष वीरेन्द्रबहादुर बस्नेत सहितले गठन गरेको उक्त पार्टीका पदाधिकारीहरूले बिहीबार भैरहवामा आयोजित कार्यक्रममा पर्यटक वृद्धिका लागि भैरहवास्थित गौतम बुद्ध अन्तर्राष्ट्रिय विमानस्थलको सञ्चालनमा जोड दिएका छन्।
कार्यक्रममा पार्टीका अध्यक्ष तथा त्रिभुवन विश्वविद्यालयका प्राध्यापक दिनेश प्रसाईं, पार्टी सदस्य समेत रहेका बुद्ध एयरका कार्यकारी अध्यक्ष बस्नेत, केन्द्रीय सदस्य तथा लगानी बोर्डका पूर्वसिईओ राधेश पन्त र पर्यटन क्षेत्रका अध्येता ज्ञानेश्वर महतोले धारण राखेका राखेका थिए।
कार्यक्रममा भैरहवा र आसपासका उद्योगी व्यवसायी र पर्यटन सरोकारवाला सहभागी थिए।
उक्त पार्टीले गौतम बुद्ध अन्तर्राष्ट्रिय विमानस्थललाई प्रभावकारी ढङ्गले सञ्चालन गरी पर्यटन प्रवर्द्धन र आर्थिक विकास कसरी सम्भव छ भन्ने विषयमा आफ्नो अवधारणा सार्वजनिक गरेको हो।
अध्यक्ष प्रसाईंले राजनीतिक दलहरूले समयानुकूल परिवर्तनलाई सम्बोधन गर्न नसक्दा समाजमा असन्तोष र आन्दोलन उत्पन्न भएको बताए।
समाजमा भइरहेको खाडलले विग्रह ल्याएको जनाउँदै उनले गतिशील पार्टीले आर्थिक रूपान्तरण र सुशासनलाई मुख्य मन्त्र बनाएको प्रसाईंको दाबी छ।
गतिशील लोकतान्त्रिक पार्टीले निर्वाचन आयोगमा दल दर्ताका लागि निवेदन दिइसकेको छ।
दर्ता प्रक्रियाका लागि करिब ५ सय सदस्यको प्रस्ताव तयार पारिएको पार्टी स्रोतले जनाएको छ। सदस्य बस्नेतले भैरहवा विमानस्थललाई सञ्चालनमा ल्याएर क्षेत्रीय पर्यटन प्रवर्द्धन कसरी गर्न सकिन्छ भन्नेबारे विस्तृत रूपमा जानकारी दिएका छन्।
गौतम बुद्ध अन्तर्राष्ट्रिय विमानस्थल र भारतको नयाँ दिल्लीस्थित विमानस्थलबिच समानता रहेका कारण यहाँबाट वाइड बडी जहाज सञ्चालन गर्न सम्भव रहेको बस्नेतले बताए।
विमानस्थल सञ्चालनका लागि कम्तीमा ५० वटा जहाज आवश्यक रहेको भन्दै उनले आफूहरूले त्यसको लागि अभिभारा प्राप्त गरेमा जहाज खरिद गरेर भए पनि विमानस्थल चलायमान बनाउन सकिने अवधारणा पेस गरे। भैरहवा विमानस्थल सञ्चालनमा ल्याएर प्रत्येक वर्ष ५ लाख पर्यटकका दरले १० वर्षमा ५० लाख पर्यटक भित्र्याउन सकिने दाबी गरे।
‘गौतम बुद्ध अन्तर्राष्ट्रिय विमानस्थलमा घण्टाको तीन वटा फ्लाइट ओहोरदोहोर गरेको खण्डमा दिनको ५० फ्लाइट हुन्छ र दिनको ५० वटा फ्लाइटबाट वर्षको ५ लाख पर्यटक हामीले भित्राउन सक्छौं, यो विमानस्थलको क्षमता के हो भनेर हामीले एयर ट्राफिक कन्ट्रोलर साथीहरूसँग यसो अनौपचारिक छलफल गर्दा उहाँहरूले ६ वटा सम्म गर्न सकिन्छ भन्नुभएको छ। त्यो हिसाबले त १० वर्षमा ५० लाख त न्यूनतम हो १ करोड पर्यटक भित्राउन सकिन्छ,’ उनले भने।
योजना आयोगका पूर्वसिइओ पन्तले पार्टीले आर्थिक क्षेत्रमा आफ्नो ४० वर्षको अनुभवलाई आधार बनाएर मुलुकमा रोजगारी वृद्धिका लागि पर्यटन प्रमुख खम्बाका रूपमा रहेको बताए। त्यसपछि कृषि, शिक्षा र सूचना प्रविधिको विकास गरेर मुलुक समृद्ध तुल्याउन सकिने निष्कर्षसहित पार्टीले एजेन्डा केन्द्रित अभियान सञ्चालन गरेको बताए।
अर्का सदस्य महतोले पार्टीले अनुमानका भरमा एजेन्डा प्रस्तुत नगरेको बताए। टेबुलमा बसेर विमर्श गरेर र कम्प्युटरमा तथ्याङ्क केलाएर वास्तविकतामा आधारित मुलुक बनाउने एजेन्डा प्रस्तुत गरिएको जानकारी दिए।
पार्टीले आगामी चरणमा मधेस प्रदेशको जनकपुरमा कृषि क्षेत्रका विषयमा बहस र कर्णाली प्रदेशको राजधानी सुर्खेतमा विकास सम्बन्धी छलफल कार्यक्रम गर्ने तयारी गरेको पनि अध्यक्ष प्रसाईंले बताए।
-1746009348.jpg)
