भदौ २३ र २४ गतेको आन्दोलनपछि २१ दलले दर्ताका लागि निर्वाचन आयोगमा निवेदन दिएका छन्।
सरकारले फागुन २१ गतेका लागि प्रतिनिधि सभाको निर्वाचन गर्न मिति तोकेको छ।
ऊर्जा, भौतिक पूर्वाधार र सहरी विकासमन्त्री कुलमान घिसिङको पार्टीका रूपमा चिनिएको उज्यालो नेपाल पार्टीले भने गत साउन २७ गते नै दर्ताका लागि निवेदन दिएको थियो। तर उक्त दलको अझै दर्ता प्रक्रिया टुङ्गिएको छैन। मंगलबार मात्र उक्त पार्टीले अध्यक्ष सहितको नयाँ केन्द्रीय समितिको विवरण आयोगमा बुझाएको छ। उक्त दलले बलेको चिम निर्वाचन चिह्न माग गरेको छ।
निर्वाचन आयोगका अनुसार भदौ २७ गते नयाँ सरकार गठन भएयता २० वटा दलले दर्ताका लागि निवेदन दिएका छन्।
आयोगले उपलब्ध गराएको विवरण अनुसार गत कात्तिक २ गते एकैदिन तीन वटा राजनीतिक दलले दर्ताका लागि निवेदन दिएका थिए। अजयकुमार राईको नेतृत्वमा राष्ट्रिय परिवर्तन पार्टी, गोपीलाल न्यौपानेको नेतृत्वमा नेपाल लिबरल पार्टी र हिराप्रसाद सोतीको नेतृत्वमा राष्ट्रिय जेन्जी पार्टी नेपाल दर्ताका लागि पुगेका थिए।
त्यसपछि कात्तिक ११ गते नेत्रविकम चन्द विप्लव महासचिव भएको पार्टी कम्युनिष्ट पार्टी नेपालले निर्वाचन आयोगमा दर्ताका लागि निवेदन दिएको छ। अघिल्लो निर्वाचन बहिष्कार गरेको विप्लवको पार्टीले चुनावमा भाग लिनकै लागि दल दर्ताका लागि निवेदन दिएको हो।
त्यस्तै, कात्तिक १३ गते कबिर सोप नेतृत्वमा नागरिक उन्मुक्ति पार्टी पनि दर्ताका लागि गएको छ।
कात्तिक १७ गते नवराज सुवेदीको जनयुग पार्टी, कात्तिक १८ गते खगेन्द्र सुनाको हाम्रो पार्टी नेपाल, कात्तिक १९ गते हिमालय बहादुर चन्दको नेपाल राष्ट्रिय युवा पार्टी आयोगमा दर्ताका लागि पुगेका छन्।
कात्तिक २१ गते एकैदिन ५ वटा पार्टीले आयोगमा दर्ताका लागि निवेदन दिएका छन्।
योगेन्द्र मण्डलको राष्ट्रिय ऊर्जाशील पार्टी नेपाल, चन्द्रप्रकाश सुवेदीको सुन्दर नेपाल निर्माण पार्टी, सबिन सिग्देलको नेपाल जनसेवा पार्टी, रत्नप्रसाद श्रेष्ठको नागरिक सर्वोच्चता पार्टी नेपाल र रिवाज अहमद शेषको राष्ट्रिय स्वराज पार्टी दर्ताका लागि आयोगमा पुगेका छन्।
कात्तिक २२ गते शनिबार थियो। लगत्तै कात्तिक २३ गते ४ वटा दल दर्ताको निवेदन लिएर आयोग पुगेका थिए।
राजकुमार कक्षपतिको नेपाल कम्युनिष्ट पार्टी (वापन्थी केन्द्र), सुन्दरराम बोहोराको आवाज पार्टी, गणेशकुमार मण्डलको सार्वभौम नागरिक पार्टी, माधवप्रसाद खतिवडाको नागरिक बचाउ दल नेपाल दर्ताका लागि आयोगमा पुगेका छन्।
कात्तिक २४ गते अकबर खानको राष्ट्र निर्माण दल नेपाल, कात्तिक २५ गते रमणकुमार कर्णको जनादेश पार्टी नेपाल र प्रशान्त सिंहको पिपुल फ्रन्ट पार्टी दर्ताका लागि आयोगमा पुगेका छन्।
आयोगले दलका केन्द्रीय समितिमा भएका व्यक्तिहरूको सनाखत गर्ने र दर्ताको निवेदन दिने काम गरिरहेको छ।
बुधबार मात्र नागरिक उन्मुक्ति पार्टीले दर्ताको प्रमाणपत्र लिएको छ। सनाखत सम्पन्न भएपछि मात्र दलहरूलाई आयोगले दर्ताको प्रमाणपत्र दिने गरेको छ।
आयोगले फागुन २१ गतेको निर्वाचनका लागि कात्तिक ३० गते भित्र दलहरूलाई दर्ताका लागि आउन भनेको छ। त्यसपछि निर्वाचनका लागि दल दर्ता हुने छैन।
यसबीचमा नेकपा माओवादी केन्द्र, एकीकृत समाजवादी पार्टी सहित १० वटा घटक मिलेर बनेको कम्युनिष्ट पार्टी नेपालले पनि आयोगलाई अध्यावधिक विवरण बुझाएको छ। तर उक्त नामको दल पहिला नै दर्ता भएकाले नयाँ दलको रूपमा दर्ता भएको छैन। यसरी पार्टी एकता हुँदा केही दलको संख्या घटेको छ। वामदेव गौतमको नेकपा एकता अभियानले पनि दर्ता खारेजका लागि निवेदन दिएको छ।
-1746009348.jpg)
