फागुन २१ गते हुन गइरहेको प्रतिनिधिसभा निर्वाचनका लागि राष्ट्रिय स्वतन्त्र पार्टी (रास्वपा) ले रूपन्देहीका तीन वटा निर्वाचन क्षेत्रमा उम्मेदवार टुंगो लगाएको छ। दुई वटा क्षेत्रमा पनि सम्भावित उम्मेदवार अघि सारेको छ।
रास्वपाको रूपन्देही क्षेत्र नम्बर ३ का सभापति मधु अर्यालका अनुसार रूपन्देही-३ मा डा. लेखजंग थापा उम्मेदवार बन्ने भएका छन्।
पार्टीको केन्द्रीय स्वास्थ्य विभाग सदस्य रहेका थापालाई रास्वपाले यसअघि रूपन्देही-३ मा हुने भनिएको उपनिर्वाचनका लागि समेत उम्मेदवार बनाउने निर्णय गरिसकेको थियो।
डा. थापालाई यसअघि नै गरिएको निर्णय अनुसार आगामी निर्वाचनका लागि पनि उम्मेदवार बनाइएको क्षेत्रीय सभापति अर्यालले बताए।
रूपन्देही-१ मा सुनिल लम्साल उम्मेदवार बन्ने पक्का भएका छन्। लम्साल पार्टीका महामन्त्री छन्।
त्यस्तै, क्षेत्र नम्बर २ मा आशिष सुवेदीलाई उम्मेदवार बनाइएको छ। सुवेदी पार्टीका साधारण सदस्य हुन्।
क्षेत्र नम्बर ४ मा कन्हैया बानियालाई उम्मेदवार बनाउने सम्भावना छ। अर्यालका अनुसार उम्मेदवारी दर्ता नगर्दासम्म कुनै निर्णय परिवर्तन नभए क्षेत्र नम्बर ४ बाट बानियाले उम्मेदवारी दिने बताए।
लुम्बिनी प्रदेशसभा सदस्य रहेका बानियाले रास्वपाबाट प्रतिनिधिसभा सदस्यको उम्मेदवार बन्ने भन्दै प्रदेशसभा सदस्यबाट राजीनामा दिइसकेका छन्।
'उम्मेदवारी दर्ता नहुँदासम्म के हुन्छ भन्न सकिँदैन, यसअघि रूपन्देहीमै एक जनाले टिकट ल्याउने र अर्को उम्मेदवार बनेका उदाहरण छन्। तर प्रदेशसभा सदस्यबाट राजीनामा दिइसकेकाले क्षेत्र नम्बर ४ मा कन्हैयाजी नै उम्मेदवार बन्नुहुन्छ,' अर्यालले भने।
२०७९ सालको प्रदेशसभा सदस्य निर्वाचनमा बानिया रूपन्देही क्षेत्र नम्बर ४ (क) बाट तत्कालीन लोकतान्त्रिक समाजवादी पार्टी (लोसपा) नेपालबाट निर्वाचित भएका थिए। त्यस्तै क्षेत्र नम्बर ५ मा रास्वपाका जिल्ला सभापति डा. बुद्धि शर्मा र तौफिक अहमद खानको चर्चा छ। उनीहरूमध्ये एक जनालाई उम्मेदवार बनाइने क्षेत्रीय सभापति अर्यालले बताए।
रूपन्देहीका अधिकांश निर्वाचन क्षेत्रमा बालेन शाहको समूहबाट उम्मेदवार बनाइएपछि रास्वपाका पुराना कार्यकर्तामा असन्तुष्टि चुलिएको छ।
रास्वपाबाट उम्मेदवार बन्ने तयारीमा रहेका सुनिल लम्साल, आशिष सुवेदी र तौफिक अहमद बालेन शाहको समूहबाट रास्वपा प्रवेश गरेका थिए। लम्साल, सुवेदी र तौफिक तीनै जना इञ्जिनियर हुन्।
रास्वपाले समानुपातिकतर्फ पनि बालेन साहको कोटाबाट देवदहकी श्रद्धा कुँवर र बुटवलकी मञ्जु ज्ञवाली भुसाललाई उम्मेदवार बनाएको छ। नेकपा एमालेको भ्रातृ संगठन युवा संघ नेपालकी पूर्व केन्द्रीय सदस्य रहेकी कुँवर र माओवादी केन्द्र र एमाले हुँदै रास्वपा प्रवेश गरेकी भुसाल साहको कोटाबाट समानुपातिक सूचीमा परेपछि रास्वपाका पुराना कार्यकर्ताले असन्तुष्टि व्यक्त गरेका थिए।
प्रत्यक्ष निर्वाचनका लागि पनि बालेन समूहबाटै उम्मेदवार छनोट भएपछि पार्टी स्थापना कालदेखि संगठन विस्तारमा खटिएका जिल्ला र प्रदेश तहका नेताहरू रूष्ट बनेका छन्।
'हामीले गाउँ गाउँमा घन्टी पुर्यायौं, तर फल खाने बेलामा पछि आएका मान्छेलाई प्राथमिकतामा पार्न पाइँदैन,' एक सदस्यले गुनासो गरे।
पार्टीभित्र अहिले बालेनका मान्छे र पुरानो रास्वपाका कार्यकर्ताबीच दुई धार देखिएको छ। बालेन शाहको सामाजिक सञ्जालमा देखिएको क्रेजलाई प्रयोग गरेर चुनाव जित्ने रणनीतिमा सभापति रवि लामिछाने सकारात्मक देखिए पनि यसले पार्टीको आन्तरिक लोकतन्त्र ध्वस्त बनाएको आरोप कार्यकर्ताहरूको छ।
-1746009348.jpg)
