युक्रेनका पूर्वऊर्जामन्त्री जर्मन गलुशेन्को पक्राउ परेका छन्।
उनी आइतबार देश छाड्ने प्रयास गरिरहेको अवस्थामा पक्राउ परेको अमेरिकी टेलिभिजन नेटवर्क सिएनएनले जनाएको छ।
गलुशेन्कोलाई गत वर्ष भ्रष्टाचार प्रकरणमा मुछिएपछि पदबाट हटाइएको थियो।
त्यतिबेला उनीमाथि करिब १ अर्ब डलर भ्रष्टचार भएको योजनासँग सम्बन्धित रहेको आरोप लागेको थियो।
त्यतिबेला युक्रेनको ऊर्जा मन्त्रालयसँग सम्बन्धित केही अधिकारीहरूले राष्ट्रिय ऊर्जा कम्पनीका ठेकदारहरूसँग मिलेर १० देखि १५ प्रतिशत कमिसन असुल्ने र असुल गरिएको रकम देशबाहिर, केही भाग रूसमा पनि पठाउने गरेको तथ्य सार्वजनिक भएको थियो।
यो प्रकरणले युक्रेनी राष्ट्रपति भोलोदिमिर जेलेन्स्कीको प्रशासनमा ठूलो दबाब सिर्जना गरेको थियो।
युक्रेनको भ्रष्टाचारबारे अनुसन्धान गर्ने ब्युरो नाबूले गलुशेन्कोलाई सीमा पार गर्दै गर्दा पक्राउ गरेको जनाएको छ।
यद्यपि उनी कहाँ जाँदै थिए भन्ने बारे भने सार्वजनिक भएको छैन। गलुशेन्कोलाई थप अनुसन्धानका लागि किभतर्फ पठाइएको सिएनएनले जनाएको छ।
गलुशेन्को यसअघि छोटो समयका लागि न्याय मन्त्री पनि रहिसकेका थिए।
यसअघि नोभेम्बरमा पूर्व उपप्रधानमन्त्री ओलेक्सी चेर्निशोव पनि अवैध सम्पत्ति आर्जनको आरोपमा पक्राउ परेका थिए भने समयमै कार्यालय दुरुपयोगमा मुद्दा दर्ता गरिएको थियो।
युक्रेनमा भ्रष्टाचारमाथि नियन्त्रण कायम गर्नु यूरोपियन युनियनमा प्रवेशको लागि प्रमुख आवश्यकता मानिन्छ।
-1746009348.jpg)
