नेकपा एमालेका उपाध्यक्ष एवं रूपन्देही क्षेत्र नं. २ का उम्मेदवार विष्णु प्रसाद पौडेलले आफ्नो निर्वाचन क्षेत्र लक्षित प्रतिबद्धता पत्र सार्वजनिक गरेका छन्।
फागुन २१ गतेको निर्वाचनको लागि पौडेलले संविधानको रक्षा, सामाजिक न्याय, समानता र सुशासनमार्फत रूपन्देहीलाई देशकै अग्रणी आर्थिक केन्द्रका रूपमा विकास गर्ने प्रतिबद्धता पत्र सार्वजनिक गरेका हुन्।
उक्त प्रतिबद्धता पत्रमा लुम्बिनीलाई केन्द्रमा राखेर समग्र क्षेत्रलाई विकासको ‘रोल मोडल’ बनाउने दृष्टिकोण अगाडि सारिएको छ।
प्रतिबद्धता पत्रमा शिक्षा, स्वास्थ्य, रोजगारी, सडक तथा सहरी पूर्वाधार, उद्योग/व्यापार, कृषि, पर्यटनदेखि सुशासनसम्मका योजना समेटिएका छन्।
शिक्षा क्षेत्र सुधारका लागि रूपन्देहीलाई विद्यालय र उच्च शिक्षाको प्रमुख केन्द्रका रूपमा विकास गर्ने उल्लेख छ।
त्यसको लागि लुम्बिनी बौद्ध विश्वविद्यालयको क्षमता विस्तार गरी स्वदेशी तथा विदेशी विद्यार्थी आकर्षित गर्ने, लुम्बिनी वाणिज्य क्याम्पसलाई व्यवस्थापन तथा सूचना प्रविधि विषयको विश्वविद्यालयमा रूपान्तरण गर्ने, बुटवल मेडिकल कलेजको पूर्वाधार निर्माण तथा सञ्चालन, बुटवल बहुमुखी क्याम्पसको स्तरोन्नति, विभिन्न सामुदायिक क्याम्पसमा शैक्षिक भवन तथा छात्रावास निर्माण, कृषि र इन्जिनियरिङ क्याम्पस स्थापना तथा नेपाल विश्वविद्यालयको स्थापना गर्न आवश्यक सहयोग गर्ने उल्लेख छ।
‘रूपन्देही मोडेल’ अन्तर्गत १०० अर्ब भन्दा धेरै कुल पूर्वाधार लगानी भइसकेको उल्लेख गरिएको छ।
यस्तै राष्ट्रिय गौरवका आयोजना र दिगो विकासमा केन्द्रित कार्यक्रममार्फत समृद्ध लुम्बिनी र सबल नेपाल निर्माण गर्ने संकल्प प्रस्तुत गरिएको छ।
‘विकास शब्द होइन, देखिने संरचना’ भन्ने नारासहित पूर्वाधार, पर्यटन, कृषि, उद्योग, शिक्षा–स्वास्थ्य र डिजिटल अर्थतन्त्रलाई एकीकृत ढंगले अघि बढाउने लक्ष्य राखिएको छ। लुम्बिनीलाई केन्द्रमा राखेर शिक्षा, स्वास्थ्य, पर्यटन, उद्योग, कृषि र सेवा क्षेत्रको समन्वित विकास; योजनाबद्ध सहरीकरण; स्रोत सुनिश्चितता; र दिगो विकासका अवधारणालाई व्यवहारमा उतार्ने उल्लेख छ।
राष्ट्रिय गौरवका तथा रणनीतिक महत्वका आयोजना लुम्बिनी प्रादेशिक अस्पताल (१२०० शैयाको) निर्माण सम्पन्न गरी पूर्ण सञ्चालन, सिद्धार्थ राजमार्ग (बुटवल–पोखरा खण्ड) स्तरोन्नति, सिद्धबाबा क्षेत्रमा निर्माणाधीन सुरूङ मार्ग सम्पन्न, बुटवल–नारायण घाट र बुटवल–गोरूसिङ्गे सडकखण्ड सहित राजमार्गहरूको विस्तार, तिनाउ नदीमा सिग्नेचर पुल निर्माण, मोतीपुर औद्योगिक क्षेत्र पुनः रेखाङ्कन र पूर्वाधार विकास, गौतम बुद्ध अन्तर्राष्ट्रिय विमानस्थल पूर्ण क्षमतामा सञ्चालन, लुम्बिनी केन्द्रित बृहत् लुम्बिनी गुरूयोजना कार्यान्वयन, काली गण्डकी–तिनाउ नदी डाइभर्सन बहुउद्देश्यीय आयोजना र बेलहिया एकीकृत जाँच चौकीको सञ्चालनलाई प्रतिबद्धता पत्रमा समेटिएका छन्।
प्रतिबद्धता पत्रमा लुम्बिनीलाई धार्मिक पर्यटनको सीमित घेराबाट बाहिर निकालेर अन्तर्राष्ट्रिय आध्यात्मिक, सांस्कृतिक र शैक्षिक केन्द्रका रूपमा विकास गर्ने लक्ष्य प्रस्तुत गरिएको छ।
लुम्बिनी गुरूयोजनाको कार्यान्वयन गर्दै लुम्बिनी र बुद्धसँग सम्बन्धित क्षेत्रहरूलाई एउटै सर्किटमा जोडेर पर्यटन हब बनाउने खाका प्रस्तुत गरिएको छ।
सडक विस्तार, ढल तथा खानेपानी व्यवस्थापन, विद्युत् आपूर्ति सुदृढीकरण, डिजिटल पूर्वाधार विस्तार र व्यवस्थित आवास विकासलाई प्राथमिकतामा राखिएको छ।
औद्योगिक क्षेत्र विस्तार, साना तथा मझौला उद्योग प्रवर्द्धन, कृषिमा आधुनिकीकरण र बजार पहुँच सुदृढीकरणमार्फत स्थानीय रोजगारी सिर्जना गर्ने लक्ष्य प्रस्तुत गरिएको छ।
विशेष गरी कृषि उत्पादनमा मूल्य शृङ्खला विकास, चिस्यान केन्द्र, प्रशोधन उद्योग र निर्यात प्रवर्द्धन कार्यक्रमलाई जोड दिइएको छ।
पूर्व अर्थमन्त्रीको हैसियतमा पौडेलले बजेट विनियोजन र स्रोत व्यवस्थापनमा आफ्नो अनुभवलाई क्षेत्रीय विकाससँग जोड्ने प्रतिबद्धता जनाएका छन्।
संघीय सरकार, प्रदेश र स्थानीय तहबिच समन्वय गरी प्राथमिकताका आयोजनाका लागि पर्याप्त बजेट सुनिश्चित गर्ने, वैदेशिक सहयोग तथा निजी लगानी भित्राउने र सार्वजनिक–निजी साझेदारी (पीपीपी) मोडेललाई प्रभावकारी रूपमा कार्यान्वयन गर्ने रणनीति अघि सारिएको छ।
प्रतिबद्धता पत्रमा उल्लेख गरिएका ठूला पूर्वाधार आयोजना समयमै सम्पन्न गर्ने, विगतमा सुरू भएका योजनालाई निरन्तरता दिने र परिणाममुखी अनुगमन प्रणाली विकास गर्ने प्रतिबद्धता पनि समेटिएको छ।
स्वास्थ्य क्षेत्रमा विशेषज्ञ सेवा विस्तार, सुविधा सम्पन्न अस्पताल निर्माण तथा मातृ–शिशु स्वास्थ्य सुदृढीकरणमा जोड दिइएको छ। त्यसैगरी, महिला सशक्तिकरण, ज्येष्ठ नागरिक सम्मान कार्यक्रम, विपन्न वर्ग लक्षित सामाजिक सुरक्षा कार्यक्रम र खेलकुद तथा सांस्कृतिक पूर्वाधार विकासलाई पनि प्राथमिकतामा राखिएको छ।
सहरी कृषि प्रवर्द्धनका लागि कोल्ड–चेन, प्रशोधन केन्द्र र ‘मेड इन लुम्बिनी’ ब्रान्डमार्फत कफी, अदुवा, सुन्तला जस्ता उत्पादन निर्यात; किसान आय दोब्बर गर्ने लक्ष्यलाई प्रतिबद्धता पत्रमा समेटिएको छ। डिजिटल लुम्बिनी अभियानमार्फत डिजिटल सेवा, पारदर्शी शासन, भ्रष्टाचारप्रति शून्य सहनशीलता हरित कोरिडोर, नदी नियन्त्रण र व्यवस्थित सहरीकरणलाई प्रतिबद्धता पत्रमा समेटिएको छ।
रूपन्देही–२ लाई डिजिटल सेवा, सफ्टवेयर विकास र आइटी हबका रूपमा विकास गर्ने, स्टार्टअप सिड फन्ड, बिना धितो परियोजना कर्जा तथा ‘पढ्दै–कमाउँदै’ कार्यक्रम कार्यान्वयन गरिने उल्लेख छ।
त्यस्तै भूमिगत विद्युत्, इन्टरनेट र केबल प्रणाली लागू गरी आधुनिक सहरी व्यवस्थापन, रूपन्देहीलाई राष्ट्रिय अर्थतन्त्रको गतिशील आर्थिक केन्द्र बनाउने दीर्घकालीन लक्ष्य, खेल पर्यटन र अन्तर्राष्ट्रिय स्तरको रंगशाला निर्माणमार्फत स्पोर्टस हबको विकास तथा जनसुनुवाइ, प्रगति प्रतिवेदन र शून्य सहनशीलता नीतिमार्फत सुशासन सुदृढीकरण गरिने उल्लेख छ।
आधारभूत अस्पताल, ट्रमा सेन्टर र आयुर्वेदिक/प्राकृतिक चिकित्सालय सुदृढीकरण, स्वास्थ्य चौकी र सहरी स्वास्थ्य केन्द्रहरूको क्षमता विस्तार, चक्रपथ, लिङ्क रोड, डबल लेन सडक विस्तार, अन्डर पास, फ्लाइ ओभर र भूमिगत पार्किङ निर्माण तथा आधुनिक स्मार्ट बसपार्क निर्माणलाई जोड दिइएको छ।
प्रतिबद्धता पत्रमा बुटवल औद्योगिक क्षेत्रको क्षमता विस्तार, धागो कारखाना पुनः सञ्चालन, सेमलार कृषि उपज थोक बजार निर्माण, तिनाउ–दानव नदी नियन्त्रण र तटबन्ध, सिँचाइ प्रणाली सुदृढीकरण गर्ने, झुम्सा खोला खानेपानी आयोजना सम्पन्न गर्ने तथा फोहोर मैला प्रशोधन केन्द्र सञ्चालन गर्ने उल्लेख छ।
-1746009348.jpg)
