सिके राउतले भने- मधेसका लागि दशकौंदेखि संघर्ष गरेका राजनीतिक शक्तिहरू शून्यमा झरे!

सेतोपाटी संवाददाता

काठमाडौं, फागुन २३

जनमत पार्टीका अध्यक्ष सिके राउतले प्रतिनिधिसभा निर्वाचनको पछिल्लो परिणामबारे प्रतिक्रिया जनाउँदै जनताको मतको सम्मान गर्ने बताएका छन्।

उनले मधेसका लागि दशकौंदेखि संघर्ष गरेका र मधेस आन्दोलनको जगमा उदाएका राजनीतिक दलहरू एकाएक शून्यमा झरेकामा चिन्ता पनि व्यक्त गरेका छन्।

'तपाईंहरूको निरन्तरको सरोकार, फोन-कल र चिन्ताप्रति आभारी छु। म ठीक छु, शान्त छु, प्रसन्न नै छु। कदाचित पनि विचलित वा उद्वेलित छैन,' उनले सामाजिक सञ्जालमा भनेका छन्, 'जनताको अभिमत हो — हामीले कदर गर्ने हो। जनताको मतलाई सम्मान गर्ने हो।'

पछिल्लो मत परिणामले आफूलाई व्यक्तिगत रूपमा कुनै दुःख नभएको उल्लेख गर्दै राउतले लेखेका छन्, 'हामी त्यसै पनि संसदीय राजनीति गर्न राजनीतिमा प्रवेश गरेका थिएनौं। त्यसैले सांसद र मन्त्री पदसँग मेरो कहिल्यै कुनै आशक्ति रहेन। संसदीय राजनीति एउटा संयोग मात्रै हो।'

उनी अगाडि लेख्छन्, 'हो, अलिकति चिन्ता लागेको चाहिँ मधेसका लागि दशकौंदेखि संघर्ष गरेका, मधेस आन्दोलनको जगमा उदाएका, मधेसका लागि त्याग, तपस्या र बलिदानी दिएका, मधेसका लागि गोली खाएका र आफ्नो जीवन नै सुम्पेका तथा मधेसका लागि निरन्तर संघर्ष गरिरहेका राजनीतिक शक्तिहरू एकाएक शून्यमा झर्नु हो।'

'खुसीको कुरो, कम-से-कम एउटा दलले झन्डै दुई-तिहाइ ल्याउन लागेको छ। अब जे गर्नु छ, जसो गर्नु छ, अकन्टक उनीहरूलाई त्यो गर्ने वातावरण बनेको छ। सकारात्मक, नकारात्मक जे गर्नु छ, गरेर देखाओस्, देशलाई निकास देओस्। हाम्रो शुभकामना छ,' उनले भनेका छन्।

उनले आफ्नो भनाइ सँगसँगै हिन्दी भाषाको गीत पनि सेयर गरेका छन् —