फागुन २१ को चुनावका लागि उम्मेदवारको मनोनयन दर्ता अघिसम्म पनि धरानका मेयर हर्क साम्पाङ तानातानमा थिए।
काठमाडौं महानगरका तत्कालीन मेयर बालेन शाहलाई पार्टीमा भित्र्याएर देशव्यापी जनलहर ल्याएको राष्ट्रिय स्वतन्त्र पार्टी होस् या रास्वपामा मिसिएर १२ दिनमै बाहिरिएका उज्यालो नेपालका कुलमान घिसिङ, हर्कसँग पार्टी एकता गर्ने ध्येयमा रहेको चर्चा थियो।
कुलमान घिसिङ र उनको टिम त चुनावअघिसम्म पनि हर्क साम्पाङ नेतृत्वको श्रम संस्कृति पार्टीसँग चुनावी सहकार्यको प्रस्ताव गरिरहेका थिए।
‘कुलमानजीको पार्टीको टिमले हाम्रो अध्यक्षलाई चुनावी सहकार्यका लागि चुनावको केही दिनअघिसम्म पनि प्रस्ताव पठाइरहेको थियो,’ श्रम संस्कृति पार्टीका एक पदाधिकारीले भने, ‘तर हाम्रो अध्यक्षज्यूले एक्लै अघि बढ्ने हो भन्ने अडान छोड्नु भएन।’
अहिले चुनावी लहर ल्याएको रास्वपा होस् या केही क्षेत्रमा राम्रो मतसंख्या ल्याएको उज्यालोसँग एकता र चुनावी सहकार्य अस्वीकार गरेका हर्क साम्पाङको दलले कोशी प्रदेशमा भने प्रत्यक्षतर्फ तीन क्षेत्रमा जित हासिल गरेको छ।
कोशीकै ३ क्षेत्रमा दोस्रो बनेको छ।
२०७९ मा धरानमा स्वतन्त्र उठेर मेयर जितेका साम्पाङले यही वर्ष मात्रै श्रम संस्कृति पार्टी स्थापना गरेका थिए। जेनजी आन्दोलनलगत्तै बनेको नागरिक सरकारमा प्रधानमन्त्री हुन इच्छा देखाएका उनले त्यो अवसर त पाएनन्।
त्यसपछि बालेन शाहसँग 'असन्तुष्ट' रहेका उनले बालेनलाई नै लक्ष्य गर्दै एकपछि अर्को स्टटास लेख्दै र बोल्दै रोष प्रकट गरेका थिए।
बालेनकै नेतृत्वमा रास्वपाले चुनावी लहर सिर्जना गरेर उनलाई प्रधानमन्त्री बनाउने निश्चित भइसक्दा पनि हर्क भने बालेनभन्दा रविलाई प्रधानमन्त्री बनाउनु पर्ने अभिव्यक्ति दिइरहेका छन्।
बालेनले पनि उनको स्टटासमा पहिलेझैं माया गरिरहने भनेर प्रतिक्रिया दिएका छन्। यसपटकको चुनावमा मुलुकभर बालेनका नाममा रास्वपाले लहर ल्याउँदा पनि बालेनविरूद्ध लगातार उभिएका हर्कले कोशी पहाडमा भने रास्वपाको लहर रोकेको चुनावी नतिजाले देखाएको छ।
पछिल्लो पटक अञ्जुलीको माटो चुनाव चिह्नमा हर्क नेतृत्वको दल श्रम संस्कृतिका ध्रुवराज राईले भोजपुरमा नेकपा एमालेका सचिव तथा कोशी प्रदेश इन्चार्ज शेरधन राईलाई पराजित गरेका छन्।
राईलाई श्रम संस्कृति पार्टीका ध्रुवराज राईले १९१३ मतान्तरमा पराजित गरेका हुन्।
ध्रुवराजले १६ हजार ६६३ मत प्राप्त गरेका छन् भने शेरधनले १४ हजार ७५० मत पाएका हुन्।
२०७४ मा एमालेबाट टेम्केमैयुङ गाउँपालिका अध्यक्ष निर्वाचित भएका ध्रुवराज २०७९ मा पनि पालिका अध्यक्षमा उठ्न चाहन्थे। यद्यपि पार्टीमा गुट नमिल्ने उनलाई शेरधनले टिकट दिन अस्वीकार गरेका थिए।
पालिकामा टिकट दिन अस्वीकार गर्ने आफ्नै पूर्व नेतालाई हराएर उनले संसद् यात्रा तय गर्दा शेरधनको 'कमब्याक' चाहना अधुरै रहन पुगेको छ।
श्रम संस्कृतिका अध्यक्ष हर्क स्वयम्ले पनि सुनसरी–१ बाट संसद् यात्रा निश्चित गरिसकेका छन्।
खोटाङमा पार्टी महासचिव आरेन राई पनि निर्वाचित भएका छन्।
आरेन राईले १६ हजार ६१२ मत प्राप्त गर्दै एमालेका वीरकाजी राईलाई पछि पारेका थिए। एमालेका वीरकाजी राईले १२ हजार ७१४ मत पाएका थिए।
सुनसरी १ मा हर्क साम्पाङले ३५ हजार ७४१ मत पाउँदा रास्वपाकी शरिन (गोमा) तामाङ २७ हजार २४९ मत पाउन सफल भइन्।
जित हात पारेका यी तीन क्षेत्रबाहेक श्रम संस्कृति पार्टी कोशीका थप तीन क्षेत्रमा प्रत्यक्षतर्फ दोस्रो भएको छ।
उदयपुर १ मा रास्वपाका पारसमणि गेलाल ३० हजार ५९० मत पाएर जित्दा श्रम संस्कृतिका राजेशकुमार राईले ११ हजार ६०६ मत पाएका थिए।
त्यस्तै पाँचथरमा कांग्रेसका नरेन्द्रकुमार केरुङ १७ हजार २३३ मत पाएर जित्दा श्रम संस्कृति पार्टीका हस्तराज शेर्मा १४ हजार ७३४ मत पाएर दोस्रो बनेका छन्।
त्यस्तै मोरङ १ मा पनि श्रम संस्कृतिले मुख्य दलहरुलाई पछि पार्ने गरी मत पाएको छ।
मोरङ १ मा रास्वपाका यज्ञमणि न्यौपाने २७ हजार ३६७ मत ल्याएर जित हासिल गर्दा श्रम संस्कृतिकी शान्ति पाख्रिन लामाले १७ हजार ५२२ मत पाउँदै दोस्रो बनेकी छन्।
अहिलेसम्म समानुपातिकतर्फ हर्कको दलले ९४ हजार ४९७ मत पाइसकेको छ। यो छैटौं धेरै मत हो।
निर्वाचन आयोगका अनुसार हालसम्म समानुपातिकतर्फ राष्ट्रिय स्वतन्त्र पार्टीले २० लाख ६९ हजार ४७ मत पाएको छ। नेपाली कांग्रेसले ७ लाख ८ हजार २४२, एमालेले ५ लाख ९८ हजार ७३८, नेपाली कम्युनिष्ट पार्टीले २ लाख ८३ हजार ७७२, राष्ट्रिय प्रजातन्त्र पार्टीले १ लाख ५० हजार ४५१ मत पाएका छन्।
श्रम संस्कृति पार्टीले पाएको मत राप्रपाभन्दा थोरै हो। तर उपेन्द्र यादव नेतृत्वको जनता समाजवादी पार्टी, नेपालभन्दा समानुपातिकमा हर्कको दल अगाडि छ। जसपा नेपालले हालसम्म ४६ हजार ७७८ मत पाएको छ।
इलाम १ मा पनि श्रम संस्कृति पार्टीका उम्मेदवार दोस्रो स्थानमा रहेर एमालेका काजिमान कागतेलाई पछ्याइरहेका छन्।
एमालेका कागतेले अहिलेसम्म ७ हजार ४८१ मतसहित अघि लाग्दा श्रम संस्कृतिका विनोद नेम्बाङ्ग लिम्बु ६ हजार ७५९ मत ल्याएर पछ्याइरहेका छन्।
-1746009348.jpg)
