बाँकेमा ४७ जना उम्मेदवारको जमानत जफत भएको छ।
जिल्लाका तीन निर्वाचन क्षेत्रमा कुल ५६ जना प्रत्यक्ष तर्फका उम्मेदवारमध्ये ४७ जनाको जमानत जफत भएको हो।
फागुन २१ भएको निर्वाचनमा खसेको कुल सदर मतको १० प्रतिशत मत प्राप्त नगरेका ४७ उम्मेदवारको जमानत जफत भएको हो।
बाँके – १
यहाँ कुल १४ जना उम्मेदवारका बीचमा प्रतिस्पर्धा भएको थियो। त्यसमध्ये ११ जनाको जमानत जफत भएको छ।
बाँके–१ मा कुल खसेको मत ७६,०६२ हो। त्यसमध्ये यहाँ ७२,३७० मत सदर भयो भने ३,६९२ मत बदर थियो। सदर मतको दश प्रतिशत मत तीन जनाले मात्रै प्राप्त गर्न सके।
यहाँबाट निर्वाचित हुने राष्ट्रिय स्वतन्त्र पार्टीका उम्मेदवार सुरेशकुमार चौधरीले ३२,७१२ मत, दोस्रो हुने नेपाली कांग्रेसका उम्मेदवार नारायणप्रसाद गौडेलले १५,३०१ मत र तेस्रो स्थान हासिल गर्ने नेकपा (एमाले) का उम्मेदवार सूर्यप्रसाद ढकालले ११०९५ मत प्राप्त गरेका थिए।
उनीहरू तीन जनाबाहेक अन्य ११ कसैले पनि जमानत जोगाउन सकेनन्। जमानत गुमाउनेहरूमा नेपाली कम्युनिस्ट पार्टीका नरेन्द्रप्रसाद पाण्डेले ६०३३ मत, राष्ट्रिय प्रजातन्त्र पार्टीका प्रदिपकुमार शाहले ३,२३३ मत, लुम्बिनी प्रदेशकी पूर्व मन्त्रीसमेत रहेकी प्रगतिशील लोकतान्त्रिक पार्टीकी कृष्णा केसीले १,२४० मत प्राप्त गरेका थिए।
अन्य आठ जना विभिन्न उम्मेदवारले ५०० मत कटाउन सकेका थिएनन्।
बाँके–२
यहाँ २० कुल जना उम्मेदवारका बीचमा प्रतिस्पर्धा भएको थियो। यहाँ कुल ७३,०५२ मत खसेको थियो। जसमध्ये ६८,४०४ मत सदर हुँदा ४,६४८ मत बदर भएको थियो। यहाँ सदर मतको दश प्रतिशत मत तीन जनाले मात्रै प्राप्त गर्न सके। अन्य १७ जनाको जमानत जफत भयो।
क्षेत्र नम्बर २ मा निर्वाचित हुने एमालेका मोहमद इश्तियाक राईले २४,६२४ मत प्राप्त गरे। लुम्बिनी प्रदेशका १२ जिल्लामध्ये प्रदेशमै पार्टीको साख जोगाउन इश्तियाक एक्ला व्यक्ति हुन्। जो निर्वाचनको समयमा मधेसी दल त्यागेर एमाले प्रवेश गरेका थिए।
दोस्रो हुने रास्वपाका विवेककुमार श्रेष्ठले १८६८२ मत, तृतीय स्थानमा आएका कांग्रेसका सुधाम्शु कोइरालाले १७,५९६ मत प्राप्त गरेका थिए। कोइराला पूर्वप्रधानमन्त्री तथा पार्टी सभापति स्व.सुशील कोइरालाका भतिजा हुन्।
यहाँ राप्रपाका ऋषिराज देवकोटाले १,७२३ मत र नेपाली कम्युनिस्ट पार्टीका दिपेन्द्र विष्टले १,४५६ मत पाएका थिए। यी दुई बाहेक अन्य कसैले पनि एक हजार मत कटाउन सकेनन्। त्यसैले १७ जनाको जमानत जफत भएको हो।
बाँके – ३
यो निर्वाचन क्षेत्रमा कुल २२ जना उम्मेदवारका बीचमा प्रतिष्पर्धा भएको थियो। कुल ७४,६१६ मत खसेको थियो। त्यसमध्ये ७१,१८४ मत सदर भयो। बाँकी ३,४३२ मत बदर थियो। खसको मतको १० प्रतसित मत तीन जना उम्मेदवारले मात्रै पुर्याउन सके। त्यसैले यहाँ पनि तीन जनाले मात्रै आफ्नो जमानत जोगाउन सके। अन्य १९ जनाको जमानत जफत भयो। यहाँ रास्वपाका खगेन्द्र सुनारले २९,५५१ मत, दोस्रो हुने एमालेका सुमन मल्लले १९,६१५ मत र तृतीय हुने कांग्रेसका लुम्बिनी प्रदेश सभापति अमरसिंह पुनले १३,२१५ मत प्राप्त गर्दै जमानत जोगाए।
यहाँ नेकपाका दिपककुमार गौरी मगरले ४,०१५ मत र राप्रपाका तारकसिंह थारूले १,९१२ मत प्राप्त गरे। अन्य कुनै पनि उम्मेदवारले पाँच सय मत कटाउन सकेनन्। त्यसैले उनीहरू सबै १९ जनाको जमानत जफत भएको हो।
समानुपातिकमा रास्वपालाई अरू भन्दा झन्डै दोब्बर मत
बाँकेका क्षेत्र नं. १ मा प्रत्यक्ष जितेको रास्वपाले समानुपातिकतर्फ पनि ३४,३८३ मत प्राप्त गर्दै पहिलो दल बन्यो। यहाँ कांग्रेसले १४,२२४ र एमालेलाई १०,३२० मत प्राप्त भयो।
त्यस्तै बाँके क्षेत्र नम्बर २ मा प्रत्यक्ष तर्फ पराजय बेहोरे पनि समानुपातिक तर्फ रास्वपाले २४,३४१ मत प्राप्त गरी पहिलो दल बन्यो।
प्रत्यक्षतर्फ चुनाव जिते पनि समानुपातिकतर्फ एमालेले २०,५५२ मत प्राप्त गरी दोस्रो र कांग्रेसले १२,४८४ मत प्राप्त तेस्रो बन्यो।
बाँके–३ मा प्रत्यक्ष पनि जितेको रास्वपाले ३१,३०६ मत प्राप्त गर्दै पहिलो दल बन्यो। एमालेले १६,२३० मत सहित दोस्रो र कांग्रेसले १३,२७८ मत प्राप्त तृतीय बन्यो। बाँकेका ३ निर्वाचन क्षेत्रमा समानुपातिकतर्फ रास्वपाले कूल ९०,०३० मत प्राप्त गरी पहिलो दल बन्यो। एमाले ४७,१०२ मत प्राप्त गरी दोस्रो ठूलो दल र कांग्रेस ३९,९८६ मत प्राप्त गरी तृतीय बन्यो।
-1746009348.jpg)
