प्रत्यक्षतर्फ दाङका तीन वटै निर्वाचन क्षेत्र क्लिनस्वीप गरेको राष्ट्रिय स्वतन्त्र पार्टीले समानुपातिकतर्फ पनि चमत्कारिक मत पाएको छ।
फागुन २१ गते भएको प्रतिनिधिसभा सदस्य निर्वाचन अन्तर्गत समानुपातिक मत गणनाको नतिजा अनुसार रास्वपाले नेपाली कांग्रेसभन्दा तीन गुणा बढी मत प्राप्त गरेको छ।
जिल्लामा समानुपातिकतर्फ दुई लाख ४३ हजार ७९ मत गणना भएको थियो। त्यसमध्ये रास्वपाले एक लाख ३१ हजार एक मत प्राप्त गरेको लुम्बिनी प्रदेश निर्वाचन कार्यालय दाङका सूचना अधिकारी गेहेन्द्र कँवरले बताए।
त्यसपछि ४१ हजार ४ सय ४८ मत प्राप्त गरी नेपाली कांग्रेसले दोस्रो बनेको छ। जिल्लामा समानुपातिकतर्फ रास्वपाले–कांग्रेसभन्दा ८९ हजार ५ सय ५३ मत बढी प्राप्त गरेको छ।
रास्वपालाई कहाँ कति मत?
रास्वपाले दाङ निर्वाचन क्षेत्र नं. १ मा गणना भएको ७७ हजार २ सय ४ मतमध्ये ४३ हजार ८ सय ४४ मत प्राप्त गरेको छ।
निर्वाचन क्षेत्र नं. २ मा उसले गणना भएको ८० हजार ८२ मतमध्ये ४२ हजार ६ सय ५ मत प्राप्त गरेको छ।
त्यस्तै क्षेत्र नं. ३ मा ८५ हजार ७ सय १३ मत गणना भएकोमध्ये ४४ हजार ४ सय ९९ मत उसले प्राप्त गरेको छ। रास्वपाले प्रत्यक्षतर्फ जिल्लामा कुल एक लाख ३० हजार ४ सय ९ मत प्राप्त गरेको थियो। दाङमा रास्वपाले प्रत्यक्षभन्दा समानुपातिकतर्फ ५ सय ९२ मत बढी प्राप्त गरेको छ।
नेपाली कांग्रेस
नेपाली कांग्रेसले समानुपातिकतर्फ कुल ४१ हजार ४ सय ४८ मत प्राप्त गर्दै जिल्लामा दोस्रो पार्टी बनेको छ। उसले क्षेत्र नं. १ मा १४ हजार ३ सय ५५, क्षेत्र नं. २ मा ११ हजार ३ सय ६९ र क्षेत्र नं. ३ मा १५ हजार ७ सय २४ मत प्राप्त गरेको छ।
नेकपा (एमाले)
नेकपा एमाले समानुपातिकतर्फ कुल ३३ हजार ३ सय ५५ मत प्राप्त गर्दै तेस्रो दल बन्यो। उसले क्षेत्र नं. १ मा ६ हजार ९ सय ८४, क्षेत्र नं. २ मा १३ हजार ९ सय २६ र क्षेत्र नं. ३ मा १२ हजार ४ सय ४५ मत प्राप्त गरेको छ।
उसका उम्मेदवारले प्रत्यक्षतर्फ जिल्ला भर प्राप्त गरेको मत ३४ हजार ३ सय ७ थियो। दाङ – २ बाट एमाले महासचिव शंकर पोखरेल चुनावमा पराजित भएका थिए।
प्रत्यक्षको तुलनामा एमालेले समानुपातिकतर्फ प्राप्त गरेको मत ९ सय ५२ ले कम हो।
नेकपा
प्राप्त समानुपातिक मतका आधारमा नेपाली कम्युनिस्ट पार्टी दाङको चौथो बढी मत प्राप्त गर्ने दल हो।
उसले क्षेत्र नं. १ मा ५ हजार ५ सय ३७, क्षेत्र नं. २ मा ७ हजार २ सय ६८ र क्षेत्र नं. ३ मा ८ हजार २ सय ५६ मत प्राप्त गरेको छ। उसले जिल्ला भर समानुपातिक तर्फ प्राप्त गरेको कुल मत २१ हजार ६१ हो। जिल्लामा नेकपाका उम्मेदवारले २१ हजार ३ सय ७६ मत प्राप्त गरेका थिए। जो ३ सय १५ ले बढी हो।
राप्रपा
राष्ट्रिय प्रजातन्त्र पार्टीले समानुपातिकतर्फ दाङको क्षेत्र नं. १ मा १ हजार ९ सय ७, क्षेत्र नं. २ मा १ हजार ७ सय ५६ र क्षेत्र नं. ३ मा २ हजार २ सय २८ समेत गरि कुल ५ हजार ८ सय ९१ मत प्राप्त गरेको छ । जो प्रत्यक्ष तर्फ उम्मेदवारले प्राप्त गरेको मत भन्दा २ हजार ७ सय ८२ ले बढी हो।
राप्रका उम्मेदवारले जिल्लामा ३ हजार १ सय ९ मत मात्रै प्राप्त गरेका थिए ।
श्रम संस्कृति पार्टी
श्रम संस्कृति पार्टीले समानुपातिक तर्फ जिल्लाको क्षेत्र नं. १ मा ७ सय ८, क्षेत्र नं. २ मा ८ सय ७१ र क्षेत्र नं. ३ मा ४ सय ७७ मत प्राप्त गरेको छ। जिल्लामा उसले प्राप्त गरेको कुल मत २ हजार ५६ हो। यो पार्टीले प्रत्यक्ष तर्फ जिल्लामा अन्य मधेसी पार्टीसँग तालमेल गरेको थियो। दाङको क्षेत्र नं. ३ बाट श्रम संस्कृति पार्टीबाट निर्वाचन लडेका टोपबहादुर महतराले २ सय २७ मत प्राप्त गरेका थिए।
-1746009348.jpg)
