रेड सीमा तैनाथ अमेरिकी विमानबाहक युद्धपोतमा आगलागी भएको छ।
इरानसँग युद्धमा भूमिका खेलिरहेको युएसएस जेराल्ड फोर्डमा बिहीबार आगलागी भएको अमेरिकी अखबार द वासिङ्टन पोस्टले जनाएको छ।
इरानसँग तनाव बढ्दै गर्दा अमेरिकाले एक महिनाअघि मध्यपूर्व क्षेत्रमा युएसएस जेराल्ड फोर्ड युद्धपोत तैनाथ गरेको थियो।
बिहीबार युद्धपोतको लाउन्ड्री क्षेत्रबाट आगलागी सुरू भएको थियो। आगलागीमा परी दुई जना नौसैनिक घाइते भएका छन्।
आगलागी तत्कालै नियन्त्रणमा लिइएकाले ठूलो क्षति हुन नपाएको अमेरिकी नौसेनालाई उद्धृत गरेर अन्तर्राष्ट्रिय समाचार संस्था रोयटर्सले लेखेको छ।
नौसेनाले आगलागी कुनै युद्धजन्य नभई प्राविधिक कारणले भएको बताएको छ। युद्धपोतको मुख्य इन्जिन तथा सञ्चालन प्रणालीमा कुनै क्षति नपुगेको र युद्धपोत अझै पूर्ण रूपमा सञ्चालनयोग्य रहेको जनाएको छ।
घाइते भएका दुई नौसैनिकको अवस्था सामान्य रहेको बताइएको छ।
उक्त विमानबाहक जहाज हाल रेड सी क्षेत्रमा तैनाथ रही इरानविरुद्ध सञ्चालन भइरहेका अमेरिकी सैन्य गतिविधिलाई समर्थन गरिरहेको छ।
यो घटना लामो समयदेखि समुद्रमा तैनाथ रहेको उक्त जहाजका लागि अर्को चुनौती बनेको छ।
यसअघि यही युद्धपोतमा पाइपलाइन तथा सरसफाइ प्रणालीसम्बन्धी समस्या देखिएको थियो।
जहाज गत जुनदेखि निरन्तर समुद्रमै तैनाथ रहेकाले निर्धारित मर्मतसम्भार समयसमेत ढिलाइ भएकाले पनि गडबडी देखिन थालेको वासिङ्टन पोस्टले लेखेको छ।
जेराल्ड फोर्ड अमेरिकी नौसेनाको सबैभन्दा नयाँ र अत्यधुनिक विमानबाहक युद्धपोत मानिन्छ।
तर लामो समयसम्म समुद्रमा तैनाथ रहँदा जहाजका विभिन्न प्रणालीमा दबाब पर्ने भएकाले यस्तो समस्या देखिने गरेको सैन्य विश्लेषकहरू बताउँछन्।
अमेरिकी सेनाले आगलागीको कारणबारे थप अनुसन्धान भइरहेको जनाएको छ।
यसअघि अर्को युद्धपोत अब्राहम लिंकनमा इरानी ड्रोन र मिसाइल आक्रमण भएको बताइएको थियो। तर अमेरिकी सेनाको सेन्ट्रल कमान्डले ती सबै समाचारहरू मिथ्था रहेको बताउँदै अब्राहम लिंकन सुरक्षित रहेको बताएको थियो।
बिहीबार नै आकाशमै तेल भर्न परिचालन गरिएको अमेरिकी सेनाको विमान इराकमा दुर्घटना भएको थियो।
इराकमा इरान समर्थित समूह इस्लामिक रेसिस्टेन्टले विमान अमेरिकी विमान खसालेको दाबी गरेको छ।
सेन्ट्रल कमान्डले भने कसैले प्रहार गरेको हतियार वा अमेरिकी सेना तर्फबाटै प्रहार भएको हतियारले लागेर दुर्घटना नभएको बताएको छ। बरू आकाशमै दुइटा जहाज ठोक्किएको हुनसक्ने बताइएको छ।
घटनापछि अर्को जहाजले भने सुरक्षित अवतरण गरेको थियो।
-1746009348.jpg)
