सर्वोच्च अदालतका न्यायाधीश सुनिलकुमार पोखरेलले आचारसंहिता उल्लंघन गरेको भन्दै न्याय परिषदमा उजुरी परेको छ।
आइतबारदेखि न्यायाधीश शारंगा सुवेदी र सुनिलकुमार पोखरेलको इजलासमा रवि लामिछानेविरूद्ध सम्पत्ति शुद्धीकरणको मुद्दा संशोधन गरी फिर्ता लिने विषयमा बहस सुरू भएको थियो।
वरिष्ठ अधिवक्ताहरूले सुनुवाइको क्रममा न्यायाधीश पोखरेल तत्कालीन समयमा रविको वकिल भइसकेको हुँदा यस रिट हेर्न नमिल्ने बताएका थिए।
तर सो मुद्दालाई हेरी आचारसंहिताको उल्लंघन गरेको भन्दै सोमबार युवराज सफलले न्याय परिषदमा उजुरी दिएका हुन्।
न्यायाधीश आचारसंहिता २०७४ को दफा ४ को उपदफा ४.५को (क) (ख) र (ग) अनुसार न्यायाधीशले मुद्दा हेर्न नमिल्ने व्यवस्था गरेको उजुरीमा उल्लेख छ।
‘मुद्दाको कुनै पक्षप्रति न्यायाधीशको खास आग्रह वा पूर्वाग्रह भएमा, विवादित विषयको प्रमाणसम्बन्धी तथ्यमा न्यायाधीशलाई व्यक्तिगत हैसियतमा पूर्व जानकारी भएमा, विवादित विषयमा न्यायाधीशले पहिले कानुन व्यवसायीको हैसियतले काम गरेको वा साक्षीको रूपमा रहेको भएमा,’ उजुरीमा भनिएको छ।
यसरी न्यायाधीश पोखरेलले निष्पक्ष सुनुवाइ गर्ने र न्याय दिने भन्ने सोच्न नसकेको भन्दै उजुरी परेको हो।
‘आचारसंहिता विपरित न्यायाधीश सुनिलकुमार पोखरेल रवि लामिछानेको मुद्दामा सरिक भएकाले उहाँले निष्पक्ष सुनुवाइ गर्ने र न्याय दिने भन्ने कुरा सपनामा पनि सोच्न सकिन्न, त्यसैले तत्काल न्याय परिषदले हस्तक्षेप गरेर हेर्दाहेर्दैमा आज चैत २ को सुनुवाइ एवं मुद्दा सम्बन्धि सम्पूर्ण काम, कारबाही रोक्न यसै निवेदनमार्फत माग गर्दछु,’ सफलले माग गरेका छन्।
उनले उजुरी दिए पनि न्याय परिषदमा दर्ता भने भएको छैन।
परिषदका सचिव जितेन्द्रबाबु थपलियाका अनुसार न्याय परिषदको क्षेत्राधिकार भित्र पर्दैन।
‘निवेदन आएको हो। तर सर्वोच्च अदालतका न्यायाधीशविरूद्ध पर्ने उजुरी हाम्रो क्षेत्राधिकार भित्र पर्दैन,’ उनले भने, ‘त्यसैले दर्ता भएको छैन।’
-1746009348.jpg)
