महिला सांसद
नेपाली कांग्रेसबाट प्रत्यक्षतर्फ चुनाव जितेकी एक मात्र सांसद हुन्- बासना थापा।
दैलेख क्षेत्र नम्बर १ मा नेकपा एमालेका उम्मेदवार रविन्द्रराज शर्मालाई हराउँदै उनी प्रतिनिधि सभा सदस्य निर्वाचित भएकी हुन्।
कांग्रेसकी थापाले १२ हजार ३ सय ७२ मत ल्याएर विजयी हुँदा एमालेका शर्मा ११ हजार ७ सय ९६ मतमै रोकिएका थिए।
एमालेका शर्मा र नेकपाका अम्मरबहादुर थापाजस्ता संसदीय राजनीतिमा अनुभवी उम्मेदवारहरूसँग उनको प्रतिस्पर्धा थियो।
१२ औं महाधिवेशनदेखि लगातार कांग्रेसकी महाधिवेशन प्रतिनिधि रहेकी बासना थापाले आफूसँग प्रतिस्पर्धामा रहेका अनुभवी नेताहरूलाई हराइन्।
दैलेख १ मा कांग्रेसले १२ वर्षपछि आफ्नै उम्मेदवार खडा गरेर जितेको हो।
२०७४ र २०७९ को चुनावमा यो क्षेत्रमा चुनावी तालमेल हुँदा कांग्रेसले उम्मेदवारी दिएको थिएन।
यसपालि ‘रूख चिह्न’मै उम्मेदवार रहेपछि कांग्रेसी कार्यकर्ता र शुभेच्छुक उत्साही देखिएका थिए। उनीहरूले त्यो उत्साहलाई जितमा परिणत गरे।
बासना थापा पहिलो पटक संसदीय निर्वाचन उठ्दा नै जितेकी हुन्।
यसअघि २०७४ सालमा नारायण नगरपालिकाको उपमेयर पदमा उठे पनि उनी पराजित भएकी थिइन्।
राजनीतिसँगै सामाजिक कार्यहरूमा सक्रिय थापा निर्वाचन जितेपछि खुसी छिन्।
‘म पहिले स्थानीय तह निर्वाचन उठेको थिएँ, थौरै अनुभव त्यसबेला पनि भयो। यसपालि संसदीय निर्वाचन उठेँ र जितेँ, जनताबाट चुनिएर आउँदा खुसी पनि लागेको छ,’ सेतोपाटीसँग कुराकानी गर्दै उनले भनिन्।
काठमाडौंमा जन्मेकी उनी विवाह गरेपछि दैलेख गएकी थिइन्।
उनले दैलेखमै राजनीति अघि बढाएकी थिइन्।
२०५७ सालमा नेविसंघमा आबद्ध भएकी उनी त्यसको चार वर्षमै नेपाली कांग्रेसको राजनीतिमा सक्रिय हुन थालेकी थिइन्।
कांग्रेसको १२ औं, १३ औं र १४ औं महाधिवेशनमा उनी महाधिवेशन प्रतिनिधि र महासमिति सदस्य भइन् भने २०७८ मंसिरमा भएको १४ औं महाधिवेशनमा केन्द्रीय सदस्य पदमा उठे पनि पराजित भएकी थिइन्।
उनी गगन थापा र विश्वप्रकाश शर्माको अगुवाइमा भएको विशेष महाधिवेशनमा सहभागी थिइन्। पार्टीभित्र रूपान्तरण र पुस्तान्तरण हुनुपर्छ भन्ने मान्यता उनको छ।
साथै उनी आफ्ना हजुरबुवाबाट राजनीतिमा प्रेरणा मिलेको बताउँछिन्।
उनका हजुरबुवा नरबहादुर थापा २०१५ सालको निर्वाचनबाट सांसद भएका थिए।
भरतशम्शेर थापा नेतृत्वको नेपाल राष्ट्रवादी गोरखा परिषदबाट नरबहादुर उम्मेदवार थिए, काठमाडौं उपत्यका पश्चिम क्षेत्रबाट त्यसबेला उनले चुनाव जितेका थिए।
हजुरबुवाबाटै प्रेरणाबाट राजनीति र समाजसेवालाई निरन्तरता दिएको उनले बताइन्। ‘नेविसंघ हुँदै पार्टी राजनीति र समाजसेवालाई मैले सँगसँगै लगेको थिएँ,’ उनले भनिन्।
मुलुकको समृद्धिको बाधक भ्रष्टाचार हो भन्ने उनलाई लागेको छ।
‘मुलुकको समृद्धिको बाधक भ्रष्टाचार नै हो, नीतिगत र कार्यगत भ्रष्टाचार अन्त्य गरी पारदर्शी प्रशासन संयन्त्रका लागि म संसदमा प्रखर हुनेछु,’ उनले भनेकी छन्, ‘सुशासन मेरो पहिलो प्रतिज्ञा हो।’
स्थानीयस्तरमै रोजगारी सिर्जना गर्न पहल गर्ने र महिलालाई आर्थिक रूपमा आत्मनिर्भर बनाउन विशेष प्याकेज तथा सीपमूलक कार्यक्रम ल्याउने प्रतिबद्धता उनले मतदातासामु राखेकी छन्।
उनले जिल्ला र यस क्षेत्रको विकास निर्माणमा पनि सक्दो सहयोग गर्ने वाचा गरेकी छन्।
‘यस क्षेत्रको विकास निर्माणका लागि मुख्य तीन खम्बाहरू पेट्रोलियम उत्खनन्, पर्यटन प्रवर्द्धन, जलविद्युत् विकास र लगानीलाई प्राथमिकतामा राखेको छु,’ उनले भनेकी छन्, ‘दैलेखलाई सडक सञ्जाल र विस्तारमार्फत अगाडि बढाउन पहल लिनेछु।’
जिल्ला अस्पताललाई १०० बेड क्षमताको रूपमा स्तरउन्नति गर्न पहल लिनेसमेत उनले मतदातासामु प्रतिज्ञा गरेकी छन्।
साथै उनले महिला र पुरूषको समान प्रतिनिधित्व हुनुपर्नेमा जोड दिएकी छन्।
‘महिलालाई ३३ प्रतिशतमात्रै होइन, ५० प्रतिशत प्रतिनिधित्व हुनुपर्छ,’ उनले भनिन्।
तीनै तहका सरकारमा महिलाको राजनीतिक रूपमा अझै प्रतिनिधित्व बढ्नुपर्ने उनले बताइन्।
‘कर्णालीले महिलालाई प्रत्यक्षतर्फ जिताएर पठाएर एउटा राम्रो सन्देश दिएको छ,’ उनले भनिन्।
महिलामाथि हुने भेदभाव अन्त्य गर्ने खालका कानुन निर्माणमा आफूले भूमिका खेल्नेसमेत उनले बताएकी छन्।
कांग्रेसले बासनासहित प्रत्यक्षतर्फ १८ र समानुपातिकतर्फ २० गरी कूल ३८ सिट जितेको छ।
-1746009348.jpg)
