निर्वाचन आयोगले फागुन २१ गते सम्पन्न प्रतिनिधिसभा निर्वाचनमा ५ अर्ब ३७ करोड रुपैयाँ खर्च भएको जनाएको छ।
आयोगले निर्वाचन प्रयोजनका लागि अर्थ मन्त्रालयसँग ७ अर्ब ८१ करोड ५ लाख बजेट माग गरेको थियो। तर अर्थ मन्त्रालयले ६ अर्ब ७६ करोड ६६ लाख रकम निकासा दिएको थियो।
आयोगले निर्वाचनको अन्तिम परिणाम राष्ट्रपतिले बुझाएसँगै खर्च पनि सार्वजनिक गरेको हो। जसअनुसार निर्वाचनमा ५ अर्ब ३७ करोड खर्च भएको आयोगले जनाएको छ।
निर्वाचन आयोगका प्रवक्ता नारायणप्रसाद भट्टराईले खर्चका हिसाबले मितव्ययी निर्वाचन भएको दाबी गरेका छन्।
उनले प्रति मतदाता २ सय ८४ रुपैयाँ खर्च भएको बताए ।
‘हामी मितव्ययी निर्वाचन गर्न सफल भएका छौँ,’ भट्टराईले भने, ‘मतपेटिका संकलनदेखि सबै खर्चको हिसाब यही हो।’
तर निर्वाचन आयोगले सुरक्षामा भएको खर्चको हिसाब भने आयोगसँग नभएको जनाएको छ। निर्वाचनको सुरक्षाका लागि अर्थ मन्त्रालयले नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागलाई पनि बजेट दिएको थियो।
निर्वाचनका बेला प्रहरीलाई सवारी साधन भारतले दिएको थियो। त्यस्तै १ लाखभन्दा बढी निर्वाचन प्रहरीको तलब भत्ताका लागि चीनले पैसा दिएको थियो।
-1746009348.jpg)
