राष्ट्रिय प्रजातन्त्र पार्टीका प्रवक्ता मोहन श्रेष्ठले पार्टी परित्याग गरी नयाँ पार्टी बनाउन जुटेका धवल शम्शेर राणालाई केही सुझाव दिएका छन्।
धवल शम्शेरसहित १८६ जना नेताहरूले आज सामूहिक रूपमा राप्रपा परित्याग गरेका थिए।
‘डियर धवल दाइ, अनेकन प्रयासका बाबजुद तपाईंलाई राप्रपामा जोगाउन सकिएन। दल बनाउने घोषणा गर्नुभएछ, प्रजातान्त्रिक मुलुकमा अध्ययन गरेको तपाईं, चुनाव बहिष्कार होइन चुनाव लड्ने दल बनाउनु होला, चुनावमा जानुपर्छ भन्ने नेता बनाउनु होला, आफ्नो दल र आफ्नै चिह्नमा भोट हाल्ने नेता, कार्यकर्ता बनाउनु होला। सरकार र सिंहदरबारतिर आँखा पनि नलगाउने दल बनाउनु होला। तपाईं त कारबाही विरोधी, पार्टी अनुशासन मान्न नपर्ने मनपरीतन्त्रको दल बनाउनु होला,’ राप्रपा प्रवक्ता श्रेष्ठले आज सामाजिक सञ्जाल फेसबुकमार्फत् राणालाई सुझाव दिएका छन्।
राप्रपा प्रवक्ता श्रेष्ठले सक्रिय राजतन्त्र समयले नस्वीकार्ने पनि बताए।
‘सक्रिय राजतन्त्र समयले स्वीकार्दैन, संवैधानिक राजसंस्थाको पक्षधर दल निर्माण गर्ने ध्येय हो भने आजैबाट तपाईंले यो एजेण्डालाई धोका दिइसक्नुभयो। कारणहरू रहस्यमय छन् तथापि समयले यसको अवश्य हिसाब राख्नेछ,’ उनले भने, ‘तपाईंले विगत र वर्तमानका कुनै अध्यक्षलाई सहज ढंगबाट काम गर्न दिनुभएन, तपाईंका भने विरोधी कोही नबनुन्। रामराज्य बनोस्, हामी अलिक परबाट तपाईंको रोमाञ्चकता हेरिरहनेछौं। विरोध गर्न पो सजिलो हुन्छ, राप्रपा र राजेन्द्र लिङ्देनलाई जे जे आरोप लगाएर पार्टी परित्याग गर्नुभयो, त्यसभन्दा एक इन्च दायाँबायाँ लागेर पार्टी चलाएर देखाउनु, तपाईंलाई चुनौती भो।’
उनले धवल शम्शेरलाई पार्टीबाट अलग हुनुको औचित्य पुष्टि गर्न पनि आग्रह गरेका छन्।
‘अरूलाई प्रश्न गरेर राजनीतिक जीवनको लामो समय व्यतित गर्नुभयो, अब प्रश्न तपाईंमाथि सुरू हुनेछन्। प्रश्नहरूबाट धुरूधुरू नरूँनु होला, रुँनु पर्दाको दिन फेरि फर्केर आउन ढिलो भइसक्छ कि, मिस्ड यु दाइ,’ उनले भनेका छन्।
