प्रतिपक्षी दल नेपाली कम्युनिस्ट पार्टी (नेकपा)का सांसद वर्षमान पुनले प्रधानमन्त्रीले संसदमा आएर जबाफ दिनुपर्ने विपक्षी दलहरूको अडान कायमै रहेको बताएका छन्।
६ दिनपछि सोमबार बसेको प्रतिनिधि सभा बैठकमा बोल्दै सांसद पुनले प्रधानमन्त्रीले संसदमा बोलेको विषयमा उनले नै जबाफ दिने र संसदको रेकर्डबाट हटाउनुपर्छ भन्ने विषयमा नेकपा लगायत सम्पूर्ण विपक्षी दलहरूको अडान कायम रहेको बताएका हुन्।
'प्रधानमन्त्रीको अभिव्यक्ति सच्चिनुपर्छ, संसदको रेकर्डबाट हट्नुपर्छ, उहाँले आएर जबाफ दिनुपर्छ भन्ने कुरामा अडान कायम छ,' उनले भने।
सँगै संसद नियमित चल्नुपर्ने विषयमा पनि प्रतिपक्षी प्रतिबद्ध रहेको उनले बताए।
त्यसका लागि सत्तापक्षले वातावरण बनाउनुपर्ने उनको भनाइ छ।
'उहाँले भन्न खोज्नुभएको के हो हाउसमा भन्नुपर्छ भन्दै आएका छौं,' उनले भने।
यसबारेमा सत्तापक्ष दलले विपक्षीहरूसँग छलफल गरेर सकारात्मक सुरूवात गरेको उनले बताए।
'प्रतिपक्षीले उठाएको मुद्दाहरूलाई सम्बोधन गर्न सत्तारूढ पार्टीबाट विभिन्न अप्सनहरू आएका छन्। सकारात्मक आएका छन्। अझै निष्कर्षमा पुगेको छैन,' उनले भने।
सांसद पुनले बैठक रोकेर आजै छलफल गर्न पनि सभामुखसमक्ष आग्रह गरे।
विपक्षीहरुको विरोध जारी भएपछि प्रतिनिधि सभा बैठक १५ मिनेटका लागि स्थगित भएको छ।
