राष्ट्रिय स्वतन्त्र पार्टी (रास्वपा) की सांसद ज्ञानु पौडेलले बोल्न पाउने अधिकारबाट वञ्चित भएको भन्दै प्रतिनिधिसभा बैठकमा नियमापत्ती गरेकी छन्।
प्रतिपक्षी दलहरुले 'नेपालले पनि भारतको जग्गा मिचेको' भन्ने प्रधानमन्त्रीको अभिव्यक्ति सच्याउनुपर्ने माग गर्दै बैठकमा विरोध गर्दै आएका छन्। प्रतिपक्षी दलहरूको विरोधका कारण केही दिनदेखि प्रतिनिधिसभा बैठक नियमत रुपमा सञ्चालन हुन सकेको छैन।
बैठकमा विपक्षी दलहरूले आफ्नो धारणा राख्ने र उभिएर अवरोध गर्ने गर्दै आएका छन्। राष्ट्रिय स्वतन्त्र पार्टीका सभापति रवि लामिछानले अवरोध खुलाउन प्रयास गरे पनि सफल भएका छैनन्। यसै सन्दर्भमा रास्वपा सांसद पौडेलले बैठक अवरोध हुँदा बोल्न पाउने अधिकार कुण्ठित भएको भन्दै नियमापत्ती गरेकी हुन्।
'प्रतिनिधिसभा सदस्यको काम, कर्तव्य र अधिकार समान छ। सत्तापक्ष र विपक्षी भन्दै गर्दा बोल्न पाउने अधिकारलाई बाधा पार्ने मनसाय देखिन्छ', पौडेलले भनिन्, 'हामी पनि जनताको मुद्दा लिएर आएका छौं। बोल्न पाउने अधिकार वञ्चित गरेर सदनलाई एकदमै कुण्ठित बनाइएको छ।'
पौडेललाई सभामुख डोलप्रसाद अर्यालले बोल्न समय दिएपछि विपक्षी दलहरूले जोडजोडले टेबल ठोकेर विरोध गरेका थिए।
तर बोल्न पाउने अधिकारबाट वञ्चित गराइएको टिप्पणी पौडेलले गरेपछि सत्तापक्षका सांसदहरूले टेबल ठोकेर समर्थन जनाएका थिए।
जेठ १७ गते प्रधानमन्त्री शाहको अभिव्यक्तिपछि विपक्षी दलहरुले संसदमा विरोध गर्दै आएका छन्। विपक्षीको अवरोधका कारण जेठ १८, १९, २५ र २६ गतेको बैठक कार्यसूचीमा प्रवेश नगरी स्थगित हुँदै आएको छ।
