नेकपा एमाले सुदूरपश्चिम प्रदेश कमिटीले त्यहाँका सरकारमा पूर्वसहमति अनुसार नै मन्त्री फेर्नु सान्दर्भिक रहेको बताएको छ।
प्रदेश अध्यक्ष कृष्ण जैशीले मंगलबार विज्ञप्ति जारी गर्दै पहिले नै सहमति भएअनुसार मन्त्री फेर्ने कुरा नै सामयिक र सान्दर्भिक रहेको भन्ने प्रदेश कमिटीको विश्वास रहेको बताएका हुन्।
‘सुदूरपश्चिम प्रदेशको संयुक्त सरकारमा नेकपा (एमाले) को संसदीय दलवाट मन्त्रिपरिषद्मा समावेश गराइएमा मन्त्रीहरूलाई फेरबदल गरी नयाँ सांसदहरूलाई समावेश गर्ने विषय तत्काल फेरबदल नगरी यथावत राख्ने भन्ने पार्टी केन्द्रको निर्णयले कार्यकर्तामा अन्यौल र आक्रोश पैदा भई दलको नेताविरूद्ध नारा लगाउने र प्रदेश कार्यालयमा तालाबन्दी गर्ने जस्ता दबाबको रूपमा गरिएका क्रियाकलापले पार्टी पंक्तिमा नकारात्मक असर पर्न गएको छ। यस्तो विषयमा पहिले नै सहमति भएअनुसार मन्त्री फेर्ने कुरा नै सामयिक र सान्दर्भिक रहेको भन्ने प्रदेश कमिटीको विश्वास छ। अतः सहमति अनुसारको निर्णय शीघ्र कार्यान्वयन हुने अपेक्षासहित धैर्य गर्न सम्बन्धित सबैमा अनुरोध गर्दछु,’ प्रदेश अध्यक्ष जैशीले जारी गरेको विज्ञप्तिमा भनिएको छ।
सोमबार सुदूरपश्चिम प्रदेश सरकारको मन्त्री हेरफेर गरिएको थियो।
नेपाली कांग्रेसले मुख्यमन्त्री कमल शाहलाई यथावत राखेर अधिकांश मन्त्री फेरेको छ।
एमालेले पनि पुराना मन्त्री हटाएर नयाँको नाम प्रदेश प्रमुखको कार्यालयमा पठाइसकेको थियो। पार्टी केन्द्रीय सदस्य सन्तोष शर्मा थापा, चक्र मल्ल तथा दमन भण्डारीलाई मन्त्री र जानकी बूढा ऐरलाई राज्यमन्त्री प्रस्ताव गर्दै नाम पठाइएको थियो। थापा भौतिक पूर्वाधार, मल्ल आन्तरिक मामिल तथा कानुन, भण्डारी भूमि व्यवस्था तथा कृषि, ऐर भौतिक राज्य मन्त्री प्रस्तावित थिए।
तर एमाले मन्त्रीहरू अन्तिम समयमा शपथका लागि रोकिएका थिए। पार्टी अध्यक्ष केपी शर्मा ओलीले सुदूरपश्चिम दल नेता राजेन्द्रसिंह रावललाई फोन गरेपछि उनीहरूको शपथ रोकिएको थियो।
अहिले यही विषयलाई लिएर सुदूरपश्चिम एमालेमा रडाको मच्चिएको छ। असन्तुष्ट पक्षले प्रदेश कार्यालय तोडफोड गर्नुका साथै कार्यालयमा ताल्चा लगाएको केन्द्रीय सदस्य नरेश रोकायाले जानकारी दिए।
उनका अनुसार विवाद समाधान गर्ने प्रयत्न भइरहेको छ।
एक नेताका अनुसार अहिले कायम रहेका अधिकांश मन्त्री महासचिव शंकर पोखरेल पक्षका हुन्। प्रदेशमा अहिले वीरबहादुर थापा भूमि व्यवस्था, सहकारी, सुरेन्द्र पाल भौतिक पूर्वाधार, हीरा सार्की आन्तरिक मामिला तथा कानुन, निर्मलादेवी साउद भौतिक पूर्वाधार राज्य मन्त्री छन्।
केही समयअघि प्रदेशमा राजेन्द्रसिंह रावललाई दल नेता हटाउने तयारी भएको थियो। त्यसपछि अध्यक्ष ओलीले प्रदेशका नेताहरूलाई गुण्डु नै बोलाएर छलफल गरेका थिए। गुण्डु छलफलमा दल नेता नफेर्ने, सरकार पुनर्गठनका बेला मन्त्रीहरू फेर्ने सहमति भएको थियो।
तदनुरूप नै मन्त्री फेरबदल गर्न लाग्दा अध्यक्षले रोकेको भन्दै अहिले असन्तुष्टि चुलिएको छ।
‘पार्टी भित्रको बदलिँदा शक्ति सन्तुलनको प्रभाव परेको छ। अहिले मन्त्री बन्न लागेका आफ्ना मान्छे होइनन् कि भन्ने डर अध्यक्षलाई हुन सक्छ, नत्र अन्तिममा किन रोक्नुपर्थ्यो र,’ एक नेताले भने।
