राष्ट्रिय स्वतन्त्र पार्टी (रास्वपा)का सांसद विपिनकुमार आचार्यले सांसद बोल्ने, सरकार नसुन्ने; जनता कराउने, व्यवस्था नसुन्ने परम्परा अन्त्य हुनुपर्ने बताएका छन्।
प्रतिनिधि सभा बैठकमा बिहीबार बोल्दै उनले शून्य समयमा सांसदले बोलेका कुरा सुनिन्छन्, टिपिन्छन् र कार्यान्वयनको प्रक्रियामा जान्छन् भने यसलाई शून्य समय होइन, पूर्ण समय भन्नुपर्ने बताएका छन्।
‘यदि यो शून्य समयमा हामीले बोलेका कुरा सुनिन्छन्, टिपिन्छन् र कार्यान्वयनको प्रक्रियामा जान्छन् भने यसलाई शून्य समय होइन, पूर्ण समय भनौं। तर यदि जनताका पीडा, सांसदका प्रश्न र देशका मुद्दाहरू जति बोले पनि शून्यमा शून्यसरि बिलाएर जाने हुन् भने यसको नाम शून्य समय होइन, ब्ल्याक होल समय राखौं,’ उनले भने।
ब्ल्याक होलमा प्रकाशसमेत हराएझैं संसदमा नागरिकको आवाज, जनप्रतिनिधिको जवाफदेहिता र सरकारको जिम्मेवारी हराउनु नहुने उनको भनाइ थियो।
शून्य समय केवल बोल्ने औपचारिकता नभइ यो जनताको पीडा संसदमा प्रवेश गर्ने संवैधानिक ढोका भएको उनले बताए।
‘तर ढोका खुलेपछि बाटो पनि हुनुपर्छ। त्यसैले मेरो पुनः स्पष्ट प्रस्ताव छ शून्य समयमा उठेका विषयहरू अभिलेखमा मात्र सीमित नगरियोस्। ती विषयहरू तत्काल सम्बन्धित मन्त्रालयमा पठाइयोस्, निश्चित समयभित्र कार्यान्वयनको प्रगति संसदलाई जानकारी गराइयोस्। सांसद बोल्ने, सरकार नसुन्ने; जनता कराउने, व्यवस्था नसुन्ने—यो परम्परा अब अन्त्य हुनुपर्छ। यो समय शून्य होइन, जनताको आवाजको पूर्ण समय बन्नुपर्छ,’ उनले भने।
