प्रमुख प्रतिपक्षी नेपाली कांग्रेसका सचेतक निश्कल राईले अर्थमन्त्री स्वर्णिम वाग्लेले बारम्बार करका दरमा हेरफेर गरेको बताएका छन्।
बजेटमाथि सामान्य छलफलमा आज भाग लिँदै राईले भने, ‘यहाँ अर्थमन्त्री पनि हुनुहुन्छ, करका दरमा बारम्बार हेरफेर गर्नुभयो, उहाँले संसदको अधिकारमा कैची चलाउनुभएको हो कि, आर्थिक विधेयकमा मनलाग्दी फेरबदल गर्नुभएको हो कि!’
सदनमा पेस भएको आर्थिक विधेयकलाई कार्यकारिणी निर्णयबाट कसरी परिवर्तन गर्न सकिन्छ भन्ने प्रश्न उनले गरे।
‘यो अक्षम्य गल्ती किन र कसको स्वार्थमा भएको हो?, सदनमा आएको विषय सदनबाटै सम्बोधन हुनुपर्ने होइन र? कुन स्वार्थमा करका दर आफूखुसी परिवर्तन भयो?,’ उनले भने, ‘सदनमा पेस भएको विधेयकलाई सरकारले आफूखुसी सच्याउन पाउँदैन। अर्थमन्त्री संविधान भन्दा माथि हुनुहुन्न, अर्थमन्त्रीको कदम उहाँ प्रतिपक्षमा हुँदाको भाषामा राजद्रोहसरह छ। यसमा छानबिन हुनुपर्छ।’
करका दर हेरफेर सामान्य त्रुटि नभएको उनले बताए।
उनले विज्ञ अर्थमन्त्रीबाट अत्यन्त आशा आफूले राखेको पनि उनले बताए। उनले राष्ट्रिय योजना आयोग सदस्य र उपाध्यक्षसमेत बनेका विज्ञ अर्थमन्त्री रहेको पनि उनले बताए। ‘५० अर्ब बढी ऋण भएको नेपाल एयरलाइन्सलाई कम्पनी मोडलमा लैजाने निर्णयको म प्रशंसक छु,’ उनले भने।
