प्रदेश अधिवेशनमा मतगणनामा पछि परेकी गोमा तामाङले राष्ट्रिय स्वतन्त्र पार्टी छाडेकी छन्। उनले सामाजिक सञ्जाल फेसबुकमा स्ट्याटस लेखेर पार्टी छाडेको बताएकी हुन्।
'आजदेखि राजनीतिबाट बिट मारेँ। मतदाता सम्पूर्ण साथीहरूलाई हार्दिक धन्यवाद व्यक्त गर्दछु,' उनले भनेकी छन्।
कोशी प्रदेश अधिवेशनमा नयाँ नेतृत्व चयनका लागि भएको निर्वाचनमा तामाङ पनि सभापतिकी प्रत्यासी थिइन्।
पहिलो चरणको निर्वाचनमा तामाङले दोस्रो मत ल्याएकी छन्। २८० मत ल्याएर चन्द्र राई विजयी भएका छन्। कुल खसेको ४९० मतमध्ये राईले ५१ प्रतिशत पूरा गरेकाले उनी सभापति निर्वाचित भइसकेका छन्। निर्वाचन समितिले विजयी घोषणा गर्न भने बाँकी छ।
तामाङले १४१ मत ल्याइन् भने सभापतिका प्रत्यासी खगेन्द्र कटुवालले ४१ र चन्द्रकुमार गौलीले २७ मत ल्याए।
निर्वाचनमा पछि परेलगत्तै राजनीति छाडेको घोषणा गरेकी तामाङ यसअघि प्रतिनिधिसभा निर्वाचनमा पनि पराजित भएकी थिइन्। उनी सुनसरी–१ बाट प्रतिनिधिसभा निर्वाचनमा श्रम संस्कृति पार्टीका अध्यक्ष हर्क साम्पाङसँग पराजित भएकी हुन्।
तामाङ रास्वपाको कोशी प्रदेशका संस्थापकमध्ये हुन्। उनी अघिल्लो निर्वाचनमा पनि त्यही क्षेत्रबाट उम्मेदवार थिइन्। पार्टीको कोशी प्रदेश समितिको कार्यवाहक सभापतिको भूमिकामा थिइन्।
