वाल्मिकी विद्यापीठको नक्कली पत्रका आधारमा आठ जना विदेशी नागरिकले अध्ययन भिसा पाएको खुलेको छ।
शिक्षा मन्त्रालयले वाल्मिकी विद्यापीठको नक्कली पत्रका आधारमा जेठ २१ गते अध्यागमन विभागलाई गरेको पत्राचारका आधारमा १० जना विदेशी नागरिकले अध्ययन भिसा प्राप्त गरेका हुन्।
ती १० जनामध्ये ८ जना भिसा पाएर सम्पर्कविहीन भइसकेका छन्।
दुई जनाका हकमा भने अध्यागमन विभागलाई शंका लागेपछि अनुसन्धान गर्दा वाल्मिकी विद्यापीठकै पत्र नक्कली भएको खुलेको हो।
'हामीले अनुसन्धान गर्दा विद्यापीठको पत्र नै नक्कली भएको पत्ता लाग्यो। शिक्षा मन्त्रालयको पत्र भने सक्कली नै रहेको पायौं,' विभागका प्रवक्ता टिकाराम ढकालले भने।
अध्ययन भिसा पाएर सम्पर्कविहीन हुनेहरू ६ चिनियाँ, १ कोरियन र १ रसियन नागरिक छन्।
प्रवक्ता ढकालका अनुसार उनीहरू यसअघि पर्यटक भिसामा नेपाल आउजाउ गरेको अभिलेखमा देखिएको छ। उनीहरू पछिल्ला ७ वर्षयता नेपाल आउजाउ गरिरहेको पनि उनले बताए।
अहिले दुई जनालाई पक्राउ गरी विभागले अनुसन्धान अघि बढाएको छ।
पक्राउ पर्नेमा एक जना वीरगन्ज महानगरपालिका-९ का सुबोध शुक्ला र चिनियाँ महिला वाङ जिनकाउ छन्। शुक्लाले अन्य विदेशीलाई पनि यसैगरी नेपाल ल्याउने गरेको स्वीकार गरेका छन्।
अध्यागमन विभागले जारी भइसकेका भिसा रद्द गर्ने प्रक्रिया अघि बढाएको छ।
शिक्षा मन्त्रालय स्रोतका अनुसार यसरी नक्कली कागजातका आधारमा मन्त्रालयबाट पत्राचार भएपछि यस विषयमा छानबिन गर्न गृह मन्त्रालयलाई पत्राचार भइसकेको छ।
'विदेशी नागरिकले नक्कली पत्र लिएर आएका रहेछन्। मन्त्रालयबाट कर्मचारीले गलत नियत राखेर पत्राचार गरेको देखिन्न। यस विषयमा नक्कली पत्रको आधारमा पत्राचार भएको खुलेपछि गृह मन्त्रालयलाई छानबिनका लागि पत्राचार भइसकेको छ,' स्रोतले भन्यो।
शिक्षा मन्त्रालयले यस विषयमा विज्ञप्ति समेत जारी गर्ने तयारी गरिरहेको छ।
