सरकारले प्रधानमन्त्री बालेन शाहको हालैको अभिव्यक्तिले भारतीय सुरक्षाकर्मी पश्चिम नवलपरासीको सुस्तामा प्रवेश नगरेको बताएको छ।
शुक्रबार मन्त्रिपरिषद बैठकको निर्णय सार्वजनिक क्रममा सरकार प्रवक्ता सस्मित पोखरेलले सो कुरा बताएका हुन्।
प्रधानमन्त्रीको अभिव्यक्तिले भारतीय प्रहरी बलको मनोबल बढेको हो? भन्ने पत्रकारको प्रश्नमा उनले भने, ‘प्रधानमन्त्रीको अभिव्यक्तिले भारतीय प्रहरी बलको मनोबल बढेको होइन, बर्सौंदेखि सुस्तामा यस्तो समस्या आउँदै गरेको थियो। यस्तोमा सबभन्दा धेरै धन्यवाद त्यहाँ बस्ने सुस्ताका नेपाली नागरिकलाई दिनुपर्ने हुन्छ। उहाँहरूले दशकौंदेखि त्यो भूमिलाई संरक्षण गर्दै आइरहनु भएको छ।’
उनले सुस्तावासी नेपाली नागरिक नै प्रशंसाका पात्र भएको भन्दै उनीहरूलाई नमन गर्नुपर्ने धारणा राखे।
पोखरेलका अनुसार सुस्ता विषयमा नेपाल सरकारले यसअघि पनि पटक–पटक आफ्नो धारणा स्पष्ट पारिसकेको छ।
उनले यो विषयलाई कूटनीतिक माध्यमबाट समाधान गर्न नेपाल र भारत दुवै पक्ष तयार रहेको जानकारी दिए।
साथै, सुस्ता सम्बन्धी विषयमा आवश्यक पहल र समन्वयका लागि परराष्ट्र मन्त्रालयले आवश्यक कदम चाल्ने विश्वास व्यक्त गर्दै सरकारले राष्ट्रिय भूमि र हितको संरक्षणमा प्रतिबद्ध रहेको बताए।
शुक्रबार बिहान नेपाली भूमिमा हतियार सहित प्रवेश गरेका भारतीय सुरक्षाकर्मीलाई पश्चिम नवलपरासीको सुस्ताका बासिन्दाले प्रतिकार गरेर फिर्ता पठाएका थिए।
शुक्रबार बिहान करिब ७ बजेतिर हतियार बोकेका ५ जना भारतीय सुरक्षाकर्मी नेपालको सशस्त्र प्रहरीको क्याम्पदेखि पूर्वतर्फ नेपाली भूमिमा प्रवेश गरेका थिए।
भारतीय सीमा नजिकैको टुटनवास्थित पानीको घोलामा बनाइएको कल्भर्ट तरेर नेपाल प्रवेश गरेका भारतीय सुरक्षाकर्मीलाई खेतमा काम गरिरहेका नेपालीहरूले प्रतिकार गरी भारततर्फ पठाएका थिए।
भारतीय सीमा नजिकैको टुटनवालाई पानीको घोलाले वारिपारि छुट्टाएको छ। घोला वारिको भूमिमा सुस्तावासीहरूले खेती लगाएका छन् भने घोला पारिको जमिनमा भारतीयले विवादित भूमि भन्दै खेती लगाउन रोक लगाएको छ। वरिपरि जङ्गलले घेरिएको घोला पारिको नेपाली भूमिमा भारतीय किसानहरूले भैँसीको चरन क्षेत्र बनाएका छन्।
