नेपाली कांग्रेसमा १ लाख ४९ हजार ३०९ जना क्रियाशील सदस्यहरूले क्रियाशील अद्यावधिक गराउन चाहेर आफै फारम भरे पनि सम्बन्धित वडाहरूले स्वीकृति दिइसकेको छैन।
महामन्त्री प्रदीप पौडेल संयोजक रहेको सदस्यता व्यवस्थापन समितिले वडाध्यक्षहरूलाई असार ५ गतेभित्र क्रियाशील अद्यावधिक अनुमोदन गरिसक्न आग्रह गरेको छ।
‘अनलाइनमार्फत प्रविष्ट भएका फाराम वडा तहबाट मिति २०८३ असार ५ गतेभित्र अनुमोदन गरिसक्न सदस्यता व्यवस्थापन केन्द्रीय समिति निर्देश गर्दछ। तोकिएको समयसीमाभित्र वडा तहबाट अनुमोदन नभएमा विधानबमोजिम क्रियाशील सदस्यता प्राप्त गर्न/नवीकरण गर्न योग्य सदस्यहरुलाई केन्द्रले स्वतः अनुमोदन गर्ने व्यवस्था मिलाइनेछ,’ समितिले शनिबार गरेको निर्णयमा उल्लेख छ।
कांग्रेसको क्रियाशील सदस्यता अद्यावधिक अभियानअन्तर्गत डिजिटल प्रणालीमा रहेका कुल ७ लाख ८२ हजार २०९ क्रियाशील सदस्यहरूमध्ये २०८३ जेठ २८ गते राति १२ बजेसम्म वडा तहमार्फत अद्यावधिक सम्पन्न भएका तथा डिजिटल प्रणालीमार्फत स्वयं अद्यावधिक फाराम भरी वडा तहमा अनुमोदनको प्रक्रियामा रहेका गरी कुल ६ लाख ८७ हजार ९३१ क्रियाशील सदस्यहरूको विवरण डिजिटल प्रणालीमा प्रविष्ट भइसकेको समितिको भनाइ छ।
उक्त संख्यामध्ये ५ लाख ३८ हजार ६२२ क्रियाशील सदस्यहरुले एनसीआइडी प्राप्त गरिसकेका छन्। बाँकी १ लाख ४९ हजार ३०९ जना क्रियाशील सदस्यले पेश गरेको स्वयं अद्यावधिक फाराम डिजिटल प्रणालीमा प्रविष्ट भई वडा तहमार्फत अद्यावधिकको प्रक्रियामा रहेको समितिले जनाएको छ।
इन्टरनेटको पहुँच अति कम भएका उच्च हिमाली क्षेत्रका केही जिल्लाहरू, विकट पहाडी जिल्लाका केही पालिका तथा क्रियाशील सदस्यता अद्यावधिक ढिलाइ भएका बारा र खोटाङ जिल्लाका हकमा क्रियाशील सदस्यता अद्यावधिक गर्ने समय मिति २०८३ असार ७ गतेसम्म कायम गरिएको पनि समितिले जनाएको छ।
कांग्रेससँग आबद्ध विदेशस्थित नेपाली जनसम्पर्क समितिहरूका हकमा क्रियाशील सदस्यता अद्यावधिक गर्ने कार्य मिति २०८३ असार १० गतेसम्म कायम गरिएको समितिको भनाइ छ।
क्रियाशील फाराम तथा अनलाइनमार्फत् नयाँ क्रियाशील सदस्यता वितरण कार्य २०८३ असार २० गतेसम्मका लागि कायम गरिएको कार्यवाहक मुख्यसचिव कृष्णप्रसाद दुलालको भनाइ छ।
क्रियाशील सदस्यता नवीकरण गरी अद्यावधिक गरिएका र नयाँ क्रियाशील सदस्यता वितरण गर्दा बुझाउनुपर्ने विधानबमोजिम तोकिएको शुल्क नबुझाइ अद्यावधिक भएको वा नयाँ क्रियाशील सदस्यता प्रविष्टि गर्दा शुल्क नबुझाएको भए त्यस्ता क्रियाशील सदस्यलाई यथाशीघ्र शुल्क बुझाउन लगाउन सम्बन्धित तहका सभापतिलाई सदस्यता व्यवस्थापन केन्द्रीय समिति निर्देशन पनि दिएको छ।
तोकिएको शुल्क नबुझाउने क्रियाशील सदस्यले १५औं महाधिवेशन प्रक्रियामा भाग लिन नपाउने कांग्रेसले जनाएको छ।
‘क्रियाशील सदस्यता अद्यावधिक गर्न तोकिएको समयसीमाभित्र विविध कारणले वडाबाट नवीकरण र अद्यावधिक गर्न छुट हुन गएको भए सोको निरन्तरतासहित अद्यावधिक गर्न चाहने क्रियाशील सदस्यहरुले मिति २०८३ असार २० गतेभित्रमा आफू क्रियाशील सदस्य रहेको प्रमाणसहित केन्द्रीय कार्यालयमा निवेदन दिन सक्नेछन्। यस्तो निवेदन नेपाली कांग्रेसको आधिकारिक इमेल ncparty2003@gmail.com मा पठाउन सकिनेछ,’ समितिले भनेको छ।
क्रियाशील सदस्यता अद्यावधिक गर्न तोकिएको समयसीमाभित्र विविध कारणले अद्यावधिक गर्न छुट हुन गएका वडाहरूले आफ्नो वडाभित्र क्रियाशील सदस्यता अद्यावधिक हुन बाँकी रहेका क्रियाशील सदस्यहरुको संख्या खुलाइ सोको अद्यावधिकका लागि आवश्यक पर्ने समयावधि ७ दिन नबढ्ने गरी नेपाली कांग्रेस केन्द्रीय कार्यालयको आधिकारिक इमेल ncparty2003@gmail.com मा निवेदन दिन सक्ने र प्राप्त निवेदनउपर सदस्यता व्यवस्थापन केन्द्रीय समितिले आवश्यक समय उपलब्ध गराउने पनि समितिको भनाइ छ।
क्रियाशील सदस्यता अद्यावधिक र नयाँ वितरण कार्यलाई नेपाली कांग्रेसको १५ औं महाधिवेशनको मूल कार्यतालिका प्रभावित नहुने गरी समय मिलान गर्ने तयारी छ।
साथै २०८२ पुस १० गतेभन्दा अगाडि प्रतिनिधिसभा क्षेत्रीय सभापतिले केन्द्रीय कार्यालयबाट बुझिलिएका फाराम भरी वडा तहबाट माथिल्लो तहमा पेस गर्ने क्रममा क्षेत्रीय कार्यसमितिले प्रणालीमा प्रविष्ट गर्न बाँकी भएका नामावली विद्यमान डिजिटल प्रणालीमा प्रविष्ट गर्न र अद्यावधिक गर्न मिति २०८३ असार ७ गतेसम्म कायम गरिएको समितिले जनाएको छ।
क्रियाशील सदस्यता आवेदन गर्दा वा डिजिटल प्रणालीमा प्रविष्ट गर्दा कुनै क्रियाशील सदस्यको वास्तविक परिचयभन्दा फरक विवरण प्रविष्ट भएको भए त्यस्तो विवरण सच्याउन पाइनेछ।
त्यसका लागि प्रणालीमा उपलब्ध गराइएको लिंक वा तहगत रुपमा जिल्ला कार्यसमितिमार्फत सिफारिस भई आएका वा व्यक्ति स्वयंले सच्याउनुपर्ने विवरणको प्रमाण (नागरिकता वा मतदाता परिचयपत्रको फोटो वा स्क्यान आदि) स्पष्टरूपमा खुलाइ २०८३ असार १ गतेदेखि असार मसान्तसम्म केन्द्रीय कार्यालयमा इमेलबाट आवेदन दिन सकिने समितिले जनाएको छ।
