नेकपा एमालेका सचिव महेश बस्नेतले पार्टीको पक्षमा दृढतापूर्वक उभिनेहरूलाई गलत आरोप लगाएर लोकप्रिय बन्न खोज्ने र विरोधीसँग साटघाट गर्ने प्रवृत्तिबाट पार्टी निर्माण हुन नसक्ने बताएका छन्।
पार्टी, पार्टीका अध्यक्ष र नेता कार्यकर्ता माथि भइरहेका चौतर्फी हमलाको एकताबद्ध रूपमा प्रतिरोध गर्ने संकल्पका साथ बागमती प्रदेशको बैठक सकिएको उनले बताए।
‘पार्टीको पक्षमा दृढतापूर्वक उभिनेहरूलाई गलत आरोप लगाएर लोकप्रिय बन्न खोज्ने र विरोधीसँग साटघाट गर्ने प्रवृत्तिबाट पार्टी निर्माण हुन सक्दैन। हाम्रो पार्टी, पार्टीका अध्यक्ष र नेता कार्यकर्ता माथि भइरहेका चौतर्फी हमलाको एकताबद्ध रूपमा प्रतिरोध गर्दै, फैलाइएका भ्रमहरू चिर्दै र जनतासँगको सम्बन्धलाई अझ सुदृढ बनाउँदै सामाजिक न्याय तथा जनहितको पक्षमा पार्टीलाई मजबुत रूपमा उभ्याउने र समृद्ध नेपाल, सुखी नेपालीको राष्ट्रिय आकांक्षा पूरा गर्ने दायित्व बहन गर्ने संकल्पका साथ बागमती प्रदेश कमिटीको बैठक सम्पन्न भएको छ,’ उनले भनेका छन्।
बैठकमा सहभागी अधिकांश नेताहरूबाट यही भावना अनुरूपका विचारहरू प्रस्तुत भएको उनले बताए। फरक दृष्टिकोण राख्ने केही साथीहरूको सुझावलाई समेत गम्भीरतापूर्वक मनन गर्दै पार्टीलाई अझ सशक्त र एकताबद्ध ढंगले अगाडि बढाउने प्रतिबद्धतासहित बैठक सम्पन्न भएको उनको भनाइ छ।
