नेपाली कांग्रेसका नेता भूपेन्द्रजंग शाहीले काठमाडौंमा युवा भेला राखेर विशेष महाधिवेशनबाट आएको केन्द्रीय समिति खारेज गर्न माग गरेका छन्।
पार्टी एकताका लागि विशेष महाधिवेशनबाट आएको केन्द्रीय समिति सबैभन्दा पहिले खारेज गर्नुपर्ने उनको भनाइ छ।
गत पुसमा तत्कालीन सभापति शेरबहादुर देउवा र नेता शेखर कोइराला पक्षको सहभागिताबिनै ५४ प्रतिशत महाधिवेशन प्रतिनिधिहरूको मागअनुसार विशेष महाधिवेशन भएर गगन थापा नेतृत्वमा कार्यसमिति आएको थियो।
विशेष महाधिवेशनविरूद्ध देउवा र तत्कालीन कार्यवाह सभापति पूर्णबहादुर खड्का सर्वोच्च अदालत गए पनि रिट खारेज भएको थियो।
निर्वाचन आयोग र सर्वोच्च अदालतले विशेष महाधिवेशनलाई वैधानिक भने पनि त्यो महाधिवेशनबाट आएको कार्यसमिति खारेज गर्नुपर्ने पक्षमा नेता शाही उभिएका छन्। पार्टी एकताका लागि सबैभन्दा पहिला उक्त केन्द्रीय समिति खारेज गरिनुपर्ने कुरा शनिबार काठमाडौंमा युवा भेला राखेर उनले भनेका हुन्।
‘विशेष महाधिवेशनका नाममा आएको यो केन्द्रीय समिति खारेज गर्नुपर्छ,’ उनले भने, ‘भ्रातृ संस्थाहरूमा गरिएका टिके नियुक्ति खारेज गर्नुपर्छ, अहिले पार्टी नेतृत्वमा रहेकाहरू विगतमा तदर्थ समिति बनाउँदा विरोध गर्नुहुन्थ्यो, अहिले खल्तीबाट नियुक्ति गर्ने? भ्रातृ संस्थाको निर्वाचन गरियोस्।’
उनले क्रियाशील सदस्यता डिजिटलका नाममा धाँधली गर्न लागेको उनको आरोप छ। ‘विशेष महाधिवेशनमा मनपर्ने मानिस भेला गरेर नेतृत्व चयन भनिएको थियो, अद्यावधिक गर्ने भन्ने र नमानेको भनेर बाहिर राख्न खोजियो,’ उनले भने।
आफूहरूको सदस्यता अद्यावधिकका नाममा खारेज गरिएको उनको भनाइ थियो।
पहिले नवीकरण गरेकै आधारमा १५ औं महाधिवेशन गर्न पनि उनले आग्रह गरेका छन्। साथै पार्टी नेतृत्व जेनजी पुस्तामा हस्तान्तरण गर्न पनि उनले आग्रह गरेका छन्।
