नेपाली कम्युनिस्ट पार्टी (नेकपा) का सांसद युवराज दुलालले प्रधानमन्त्री वालेन्द्र शाहले देश बनाउने तीन जनाको जम्बो टोली घोषणा गरेको भन्दै टिप्पणी गरेका छन्।
सांसद दुलालले सोमबार प्रतिनिधि सभा बैठकमा बोल्दै प्रधानमन्त्री शाहले बिदा मनाइसकेर फुर्सदमा भएकाले अब देशका जल्दाबल्दा समस्यामा ध्यान दिने भन्दै कटाक्ष पनि गरे।
‘प्रधानमन्त्रीज्यूले बिदा पनि मनाइसक्नुभएको छ। देश बनाउने उहाँले तीन जनाको जम्बो टोली पनि घोषणा गरिसक्नुभएको छ,’ उनले भने, ‘अब पक्कै पनि केही फुर्सद भयो होला। अब सदनमा आएर टेक्पो गुल्ट्याएका, घरका छानामा ढुंगा हानेका, हाम्रा उद्योगहरू बन्द हुन लागेका कारणहरू यो सदनमा दिए सदनमार्फत् जनताले राहत अनुभूति गर्थे भन्ने हामीलाई लागेको छ।’
शून्य समयमा बोल्दै उनले भारतले निर्यात रोक्दा मेचीका चिया उद्योग बन्द हुन लागेको भन्दै सरकारको ध्यानाकर्षण गराएका छन्।
प्रधानमन्त्रीले सीमासम्बन्धी दिएको अभिव्यक्ति रेकर्डबाट हटाउन उनले आज पनि माग गरे। उनले यसका लागि सभामुखले रूलिङ गर्नुपर्ने र प्रधानमन्त्रीले स्पष्टीकरणसमेत दिनुपर्ने धारणा राखे।
