श्रम संस्कृति पार्टी संसदीय दल नेता हर्क साम्पाङले प्रधानमन्त्री बालेन शाहको अभिव्यक्ति रेकर्डबाट हटाउन कहिले आदेश दिने हो भनेर सभामुख डोलप्रसाद अर्याललाई सोधेका छन्।
आजको प्रतिनिधि सभा बैठकमा बोल्दै उनले प्रधानमन्त्रीले दिएको 'नेपालले पनि भारतको जग्गा मिचेको रहेछ' भन्ने अभिव्यक्ति रेकर्डबाट हटाउनुपर्ने पार्टीको माग कायमै रहेको बताए।
‘प्रधानमन्त्रीज्यूले दिनुभएको अभिव्यक्तिलाई संसदको रेकर्डबाट हटाइयोस् भन्ने माग कायमै छ। सभामुखज्यूले कहिले हटाउने आदेश दिनुहुन्छ भनेर हामी पर्खिरहेका छौं,’ उनले भने, ‘मलाई लाग्छ- तपाईंले चाँडै नै त्यो अभिव्यक्ति हटाउने आदेश दिनुहुन्छ।’
सुस्तामा भारतीय एसएसबी छिरेर अतिक्रमण गर्न खोजेको र जनतालाई आतंकित गर्न खोजेको उनले बताए। एसएसबी सुस्ता आएको विरोधमा माइतीघरमा विरोधमा उत्रिएका दुई युवालाई नियन्त्रणमा लिएर हिरासतमा राखिएको पनि उनको भनाइ थियो। ‘ती युवाहरूलाई दु:ख नदिनुस्, गृहमन्त्रीलाई भन्न चाहन्छु,’ उनले भने।
सिराहामा विद्यार्थीका मोबाइल पानीमा डुबाएर नष्ट गर्नेहरूमाथि कारबाही गर्नुपर्ने उनले बताए। उनले टेप्पो भिरबाट पल्टाएको विषय पनि उठाएका थिए। दोषीमाथि कारबाही हुनुपर्ने र पीडितलाई क्षतिपूर्ति दिलाउनुपर्ने पनि उनले बताए।
प्रहरी पछिल्लो समय उदण्ड रूपमा प्रस्तुत भएको उनको भनाइ छ। उनले यस विषयमा संसदमै रहेका गृहमन्त्री सुधन गुरूङलाई पनि ध्यानाकर्षण गरेका थिए।
