नेपाली कांग्रेसका उपसभापति विश्वप्रकाश शर्माले प्रधानमन्त्रीले आफ्ना मन्त्रीहरूको बोलीमा लगाम लगाउनुपर्ने बताएका छन्।
पूर्वाधार मन्त्री सुनिल लम्सालले धादिङमा सडक अनुगमन गर्दै 'काम नगर्ने ठेकेदारको खुट्टा भाँचिदिनू' भनेर दिएको अभिव्यक्तितर्फ लक्ष्य गर्दै उपसभापति शर्माले प्रधानमन्त्री बालेन शाहबाट मन्त्रीहरूको बोलीमा लगाम लगाउनुपर्ने बताएका हुन्।
‘हामी यस्तै समाजतर्फ जाँदैछौं? यदि जाँदै छैनौं भने कम्तीमा आफ्नो मन्त्रीहरूको बोलीमा लगाम लगाउनुस् प्रधानमन्त्रीज्यू,’ आज दिउँसो एक भिडिओ सन्देश जारी गर्दै उपसभापति शर्माले भनेका छन्।
उनले धनगढीमा एक श्रमिक महिलाको टेम्पोलाई कर्मचारीले भिरबाट धकेलिदिएको, सिराहामा विद्यार्थीका मोबाइल पानीमा डुबाएर नष्ट गरेको र मन्त्री लम्सालले दिएको अभिव्यक्तिले समाज कता जाँदैछ भन्ने प्रश्न देखा परेको उनको भनाइ छ।
‘यी घटनाले प्रधानमन्त्रीज्यू, समाज कता जाँदैछ? यहाँलाई सोधौं भन्ने लाग्छ, तर यहाँले पनि चुनावका बेला भन्नुभएको थियो- बाटो निर्माण ढिलो भयो भने रूखमा बाँधेर समाधान गर्नुपर्छ, म सम्झन्छु एउटा देशको घटना जहाँ एक जनाले चोरी गर्यो। चोरलाई सजाय दिन दुई वटै हात काटियो, के हामी यस्तै समाजतर्फ जाँदैछौं?’ उनले भने।
