नेपाली कांग्रेसले पार्टीको भ्रातृ संस्था नेपाल दलित संघको केन्द्रीय अध्यक्षमा विपेन्द्र रामुदामुलाई नियुक्त गरेको छ।
सभापति गगन थापाले सोमबार चितवनका रामुदामुलाई दलित संघ अध्यक्ष नियुक्त गरेका हुन्।
रामुदामु कांग्रेस महाधिवेशन प्रतिनिधि र महासमिति सदस्य हुन्। उनी यसअघि नेपाल दलित संघ केन्द्रीय सदस्य पनि थिए।
साथै उनी नेपाल सुनचाँदी व्यवसायी तथा कालिगढ संघर्ष समितिका संयोजक पनि छन्।
दलित संघले लामो समयदेखि महाधिवेशन गर्न सकेको छैन। यसअघि शेरबहादुर देउवा सभापति हुँदा पनि तदर्थ समिति बनाइएको थियो।
उक्त समितिले महाधिवेशन गर्न नसकेपछि स्वत: विघटन भएको थियो।
कांग्रेस केन्द्रीय कार्यसम्पादन समितिको वैशाख २१ को निर्णयअनुसार सभापति थापाले रिक्त नेपाल दलित संघको अध्यक्षमा रामुदामुलाई नियुक्त गरेका हुन्।
उनलाई तोकिएको समयभित्रै महाधिवेशन सम्पन्न गर्न ११ बुँदे कार्यादेश र कार्यविवरणसहित जिम्मेवारी दिइएको कार्यवाहक मुख्यसचिव कृष्णप्रसाद दुलालले जानकारी दिए।
