प्रतिनिधि सभा अन्तर्गतको पूर्वाधार विकास समितिका सभापति आशिष गजुरेलले पूर्वाधार विकास मन्त्री सुनिल लम्साललाई पूर्वजानकारी गराएर बैठक बोलाइएको भए पनि उनी अनुपस्थित हुनु गम्भीर विषय भएको भन्दै असन्तुष्टि व्यक्त गरेका छन्।
मंगलवार बसेको समितिको बैठकमा सभापति गजुरेलले मन्त्रीको यो अनुपस्थितिबारे मन्त्रालयसँग औपचारिक स्पष्टीकरण माग गरिने जानकारी दिए।
पहिलो बैठकमा नै मन्त्री उपस्थित नभएकोमा प्रश्न उठाउँदै उनले निर्माण तथा यातायातको क्षेत्रमा समाधान गर्नुपर्ने धेरै समस्याहरू भएकाले मन्त्री समितिप्रति उत्तरदायी हुनुपर्ने स्पष्ट पारे।
सभापति गजुरेलले भने, ‘यसमा सम्बन्धित मन्त्रालयको मन्त्रीज्यू अनिवार्य हुनुपर्छ भन्ने हामी सबै जनाको धारणा हो। त्यही भएर मन्त्रीज्यूलाई खबर गरेर यो मिटिङ राखिएको हो। अब उहाँसँग समय लिएर भन्दा पनि हामीले चाहिँ एजेण्डाको गाम्भीर्यता बुझेर छलफल राख्छौं। उहाँलाई जानकारी पनि हुन्छ र उहाँहरू पनि आउनुपर्छ, यसमा कुनै पनि दुईमत छैन। उहाँसँग हामी यो विषयमा छलफल गर्छौं। घनिभूत रूपमा छलफल गर्छौं। किन आउनु भएन भनेर पनि हामी यसमा चाहिँ सोध्छौं। यो शुक्रबारै जानकारी भएर उहाँलाई पनि हामीले पटक–पटक जानकारी गराएको हो र त्यो हिसाबले हामीले मिटिङ राखिएको हो।’
बैठकमा सभापति गजुरेलले मन्त्रीको अनुपस्थितिको आलोचना मात्र गरेनन्, सडक सुरक्षा र यातायात व्यवस्थापन जस्तो गम्भीर विषयमा सरकारले चासो नै नदिएको आरोप समेत लगाए।
नेपालमा दैनिक औसत सात जनाको सडक दुर्घटनामा मृत्यु हुने गरेको दर्दनाक तथ्यांक उल्लेख गर्दै उहाँले सडक सुरक्षा अहिले राष्ट्रिय चिन्ताको विषय बनेको बताए।
बैठकमा राष्ट्रिय स्वतन्त्र पार्टी (रास्वपा) का सांसद धनेन्द्र कार्की, नेपाली काँग्रेसकी सांसद बासना थापा र नेकपा एमालेकी सांसद नीता घतानीले समेत मन्त्री बैठकमा नआएको भन्दै कडा प्रश्न उठाएका थिए।
