कोशी प्रदेशका आन्तरिक मामिला तथा कानुन मन्त्री इन्द्रमणि पराजुलीको विराटनगरस्थित निवासमा बिहीबार मध्यरातमा छापा मार्न पुगेको प्रहरी पर्खाल नाघेर मन्त्री निवास प्रवेश गरेको पाइएको छ।
जिल्ला प्रहरी कार्यालय मोरङबाट खटिएको प्रहरी टोली विराटनगर-३ ल क्याम्पस छेउमा रहेको मन्त्री पराजुलीको क्वाटरमा राति ११ बजेतिर पुगेको थियो।
'प्रहरी टोली पर्खाल नाघेर आएको थियो,' मन्त्री निवासका एक कर्मचारीले भने, 'कोठाहरू खानतलासी गरेपछि टोली फर्केको थियो। हिजो राति मन्त्रीज्यू निवासमा हुनुहुन्नथ्यो।'
धनकुटाबाट प्रदेश सभामा दोस्रोपटक निर्वाचित एमाले नेता पराजुलीको निवासमा प्रहरीले किन छापा मारेको भन्ने खुलेको छैन।
मन्त्री निवासमा मध्यरातमा प्रहरी प्रवेश गरेर छापा मारेको घटनापछि मुख्यमन्त्री कार्यालयले यसबारे प्रशासनसँग सोधेको मुख्यमन्त्री कार्यालय स्रोतले जानकारी दिएको छ।
'विमल भट्टराई नामका एक जना फरार व्यक्ति खोज्ने क्रममा प्रहरी त्यहाँ पुगेर पर्खाल नाघेर भित्र छिरेछ। तर, खानतलासी गरिसकेपछि मात्रै प्रहरीलाई मन्त्री निवास भन्ने जानकारी भएछ,' मोरङ जिल्ला प्रशासनले मुख्यमन्त्री कार्यालयलाई घटनाबारे भनेको छ, 'मन्त्री निवास भन्ने थाहा नभएर प्रहरी प्रवेश गरेको हो।'
मन्त्री निवासबारे नै जिल्ला प्रहरी कसरी बेखबर थियो भन्नेबारे प्रहरीले बताउन चाहेको छैन। सुरक्षा निकायले मन्त्री प्रदेश सांसद सबैको दैनिक मोबिलाइजेसनबारे जानकारी राख्ने गरेका हुन्छन्।
मन्त्री पराजुली भने विराटनगर बाहिर रहेकाले यसबारे खुलेर बोल्न चाहेनन्।
'म त बाहिर संखुवासभातिर छु। खै छरछिमेकीले पुलिस आएर के के गर्यो भन्ने जानकारी गराउनु भयो। प्रहरीलाई नै बुझुम् न,' उनले भने।
मन्त्री निवासमा रहेका एक कर्मचारीका अनुसार राति ११ बजेतिर आएको प्रहरीको एक समूहले निवासका कोठा कोठामा तलासी लिएको थियो।
मन्त्रीको निवासमा प्रहरीले खानतलासी गरेको विषय प्रतिनिधि सभामै उठेको छ।
शुक्रबारको बैठकमा धनकुटाका सांसद राजेन्द्र राईले यो कुरा उठाएका छन्।
सेतोपाटीले यस बारेमा मोरङ प्रहरी प्रमुख एसपी कवित कटवाललाई मन्त्री निवासमा प्रहरीले किन छापा मारेको हो ? भनेर सोधेको छ। जबाफमा उनले छापा मारेको भन्न अस्वीकार गरे।
'गलत प्रचार भयो, हामीले छापा मारेको होइन, एक जना व्यक्ति त्यहाँ लुकेर बसेको भन्ने सूचना आएपछि प्रहरी गएको हो,' एसपी कटवालले भने 'प्रहरी भित्र पसेन। बाहिरबाटै फर्क्यो।'
उनले सूचना सही नभएका कारण प्रहरी निवासभित्र नपसेको दाबी गरे।
भित्र प्रवेश नगरी कोही व्यक्ति लुकेको नलुकेको कसरी थाहा भयो भन्नेबारे प्रहरीले केही बताउन चाहेन।
