राष्ट्रिय स्वतन्त्र पार्टी (रास्वपा) ले एक जना उपसभापति, एक जना महामन्त्री, २ सहमहामन्त्री, कोषाध्यक्ष, सहकोषाध्यक्ष, प्रवक्ता, सहप्रवक्ता तथा ५० जना केन्द्रीय सदस्य मनोनीत गर्ने तयारी गरेको छ।
सहमहामन्त्री विपिन आचार्य नेतृत्वको विधान मस्यौदा समितिले मनोनीत गर्ने कोषाध्यक्ष, सहकोषाध्यक्ष, प्रवक्ता, सहप्रवक्ता सहित ६ जना पदाधिकारी र २९ केन्द्रीय सदस्य मनोनीत गर्ने प्रस्ताव गरेको थियो।
त्यो प्रस्तावलाई पनि संशोधन गरेर एक उपसभापति, महामन्त्री २ जना सहमहामन्त्री थप मनोनीत गर्ने तयारी गर्न लागिएको एक नेताले बताए।
उनकाअनुसार यो प्रस्ताव शनिबार बस्ने केन्द्रीय समितिमा पेस हुनेछ। केन्द्रीय समितिले पास गरे विधानको अन्तिम मस्यौदा पूरा हुनेछ।
रास्वपाको सचिवालय बैठकले आइतबारदेखि सुरू हुने महाधिवेशनमा यी बाहेक अन्य पद निर्वाचनबाट प्रतिस्पर्धा गरेर आउनुपर्ने निर्णय गरेको हो।
बिहीबारको सचिवालय बैठकले पार्टी विधानमा संशोधन गरेर वरिष्ठ नेताको पद राख्ने निर्णय गरेको थियो। विधानमा नभए पनि चुनाव अघि बालेन शाहलाई वरिष्ठ नेताको पद दिइएको थियो।
सहमहामन्त्री विपिन आचार्यको संयोजकत्वको विधान संसोधन समितिको प्रतिवेदनमा वरिष्ठ नेताको पद राख्ने प्रस्ताव थिएन। बिहीबार सभापति रवि लामिछाने नेतृत्वमा बसेको सचिवालय बैठकले पार्टी विधानमा वरिष्ठ नेताको पद राख्ने निर्णय गरेको एक नेताले बताए।
उक्त बैठकले केन्द्रीय समितिको संख्या बढाएर १५८ बनाउने निर्णय पनि गरेको छ। अहिले १२१ सदस्य छन्।
समितिको संशोधन प्रस्तावमा भने केन्द्रीय सदस्यको संख्या बढाएर १३६ बनाउने उल्लेख थियो। ती नेताका अनुसार रास्वपा सचिवालयले पदाधिकारीको संख्या बढाएर १९ सदस्यीय बनाउने निर्णय पनि गरेको छ।
‘रास्वपामा अब १५८ केन्द्रीय सदस्य, १९ जना पदाधिकारी, एक वरिष्ठ नेता र एक जना सभापति हुने निर्णय भएको छ,’ उनले भने।
उनका अनुसार एक सभापति, एक वरिष्ठ नेता, एक महिलासहित ३ उपसभापति, महामन्त्री २, एक महिलासहित ५ सहमहामन्त्री, प्रवक्ता १, एक महिलासहित ३ सहप्रवक्ता, १ कोषाध्यक्ष ,एक महिलासहित २ जना सहकोषाध्यक्ष रहेछन्।
