पूर्वप्रधानमन्त्री एवं नेपाली कम्युनिष्ट पार्टीका संयोजक पुष्पकमल दाहालले केहीले पार्टीभित्र कलह र जनतामा निराशा बाढ्ने काम गरिररहेको आरोप लगाएका छन्।
पार्टीका वरिष्ठ नेता झलनाथ खनालले बुझाएको ३६ बुँदे आरोपपत्रलाई लक्षित शुक्रबार पार्टी कार्यालय पेरिसडाँडामा आयोजित कार्यक्रममा बोल्दै संयोजक दाहालले यस्तो टिप्पणी गरेका हुन्।
पूर्वप्रधानमन्त्री समेत रहेका पार्टीका वरिष्ठ नेता खनाल प्रतिक्रियावादीसँग मिलेर पार्टीमा विचलन ल्याउन उद्द रहेको दाहालको आरोप छ।
उनले कम्युनिष्ट पार्टीहरूले इतिहासमा भोगेका अनुभवहरू नबिर्सन समेत आग्रह गरे।
केही दिनअघि नेता खनालले संयोजक दाहाललाई लेखेको असन्तुष्टि पत्रमा वर्तमान नेतृत्वले पार्टी एकता, वैचारिक स्पष्टता र सङ्गठनात्मक पुनर्गठन गर्न नसकेको गम्भीर आरोप लगाएका थिए।
पार्टीको अन्तरिम विधानलाई सार–सङ्ग्रहवादी खिचडी विधानको संज्ञा दिँदै त्यसबाट क्रान्तिकारी कम्युनिष्ट पार्टी निर्माण हुन नसक्ने खनालको दाबी थियो।
उनले भने, ‘जानेर वा नजानेर हाम्रा कतिपय साथीहरूले समेत जनतामा निराशा बाढ्ने काम गर्दैछन्। फेरि एकचोटि जनतालाई लिएर हामी अघि बढ्छौँ भन्ने कन्फिडेन्स, आत्मविश्वास होइन, हामी कम्युनिष्टहरू विगतमा यस्ता उतारचढाव धेरै भोग्दै आएका, तीसँग लड्दै र जित्दै आएका जात हौँ हामी भन्ने कुरा बिर्सेर साम्राज्यवादी र प्रतिक्रियावादीले फैलाएको हल्लाअनुसार के के कुरा भनेर भ्रम छर्ने पनि कतिपय मानिसहरूले गरेका छन्। ती साथीहरूलाई पनि म अपिल गर्न चाहन्छु, प्रतिक्रियावादीलाई फाइदा पुग्नेगरी निराशाको खेती नगरौँ।’
संयोजक दाहालले प्रतिक्रियावादीलाई फाइदा पुग्नेगरी निराशाको खेती नगर्न अपिल समेत गरे। –न्युज एजेन्सी नेपाल
