नेपाली कांग्रेसका महामन्त्री प्रदीप पौडेलले देशलाई आर्थिक संकटबाट जोगाउने वैदेशिक रोजगारीमा गएका नागरिकहरूको रोजगारीलाई सुरक्षित र मर्यादित बनाउनु राज्य र सबैको साझा दायित्व भएको बताएका छन्।
नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसनको १३ औं निर्वाचन सहितको साधारण सभालाई आज काठमाडौंमा सम्बोधन गर्दै महामन्त्री पौडेलले सो कुरा बताएका हुन्।
कार्यक्रममा बोल्दै उनले भने, 'वैदेशिक रोजगारीमा जानुभएका लाखौं नेपाली दाजुभाइ तथा दिदीबहिनीहरूको पसिनाले आज नेपालको अर्थतन्त्र र जिडिपीको मुख्य हिस्सा धानिएको छ। देशलाई आर्थिक संकटबाट जोगाउने नागरिकहरूको रोजगारीलाई सुरक्षित र मर्यादित बनाउनु राज्य र हामी सबैको साझा दायित्व हो। यस क्षेत्रका नीतिगत समस्याहरू समाधान गर्न र श्रमिकहरूको हकहित सुनिश्चित गर्न नेपाली कांग्रेस सदैव प्रतिबद्ध छ।'
साथै, महामन्त्री पौडेलले लोकतान्त्रिक मूल्य र मान्यतालाई आत्मसात गर्दै वैदेशिक रोजगार व्यवसायलाई पारदर्शी र सेवामुखी बनाउन एसोसिएसनमा आबद्ध व्यवसायीहरूलाई आग्रह समेत गरे।
