नेपाली कांग्रेसका सभापति गगन थापाले पासपोर्ट काण्डको निष्पक्ष छानबिन हुनुपर्ने माग गरेका छन्।
नेपाली कांग्रेसको नियमित संवाद शृंखला 'ग्रिन टेबल' मा बोल्दै सभापति थापाले पासपोर्ट काण्डबारे छानबिन सुरू भएकोमा सन्तोष व्यक्त गर्दै यसलाई निष्कर्षमा पुर्याउनुपर्ने बताए।
'पासपोर्ट काण्डबारे छानबिन सुरू भएको भन्ने थाहा भयो, यो छानबिन हुनैपर्छ,' सभापति थापाले भने, 'तर त्यसमा पनि विधि भने पछ्याउनै पर्छ।'
आफूहरूले सुरूदेखि नै राज्य र पार्टीभित्र समेत सुशासनको पक्षमा आवाज उठाउँदै आएको बताउँदै सभापति थापाले सुशासन स्थापना गर्ने लडाइँमा आफूहरू अहिले पनि अडिग रहेको जिकिर गरे।
सरकारले आर्थिक अपचलन र भ्रष्टाचार गर्नेहरूलाई कारबाही गर्ने भनेर सम्पत्ति छानबिन आयोग गठन गरेको विधि र प्रक्रिया नमिलेको उनको भनाइ थियो।
आफूहरू सम्पत्ति छानबिन हुनुपर्छ भन्नेमा प्रष्ट रहेको तर त्यसमा कानुनी विधि-प्रक्रिया मिचिनु हुँदैन भन्नेमा पनि उत्तिकै सचेत रहेको सभापति थापाको भनाइ थियो।
‘हामी भ्रष्टाचारको विरूद्धमा लडेर आएका हौं। तर अहिले सामान्यीकरण गरेर सबै गलत भन्ने भाष्य बनाइँदैछ। हामी यो सफा गर्छौं। त्यसैका लागि पनि हामीसहित सबैको सम्पत्ति छानबिन गर भन्छौं। तर त्यो काम विधि र कानुनलाई पछयाएर हुनुपर्छ। हाम्रो चासो यही हो।’
शासकीय सुधारको कानुनी प्रबन्ध नगरेरै सम्पत्ति छानबिनको हतारो गर्दा जनताको सुशासनको चाहना फेरि पनि नतिजामा पुग्दैन कि भन्ने चिन्ता थपिएको थापाले बताए।
वैधानिक रूपमा संसदबाट शक्तिशाली छानबिन आयोग गठन गरेर अघि बढेको भए यसको क्षेत्राधिकार स्पष्ट हुने, काम गर्ने शैली प्रभावकारी हुने तथा त्यसबाट जनतामा विश्वसनीयता अझ धेरै बढ्नजाने सभापति थापाको भनाइ थियो।
थापाले आफूहरूले सम्पत्ति छानबिन आयोगलाई सम्पत्ति विवरण बुझाउने पनि जानकारी दिए।
उनले भने, ‘विधि र कानुनभन्दा माथि कोही हुँदैन। हामीहरू आयोगलाई सम्पत्ति विवरण बुझाउँछौं। तर विधि र प्रक्रियाको कुराहरू पनि सँगसँगै उठाइरहन्छौं। किनकि हामी नेपाली समाजलाई प्रष्ट बनाउन चाहन्छौं।’
