राष्ट्रिय प्रजातन्त्र पार्टी (राप्रपा) ले केन्द्रीय महाधिवेशन मंसिर २६, २७ र २८ गते गर्ने निर्णय गरेको छ।
असार ५ र ६ गते काठमाडौंमा बसेको केन्द्रीय समिति बैठकले आगामी मंसिरमा महाधिवेशन गर्ने निर्णय गरेको हो।
महाधिवेशन काठमाडौंमा हुनेछ।
राप्रपाले २०७८ मा महाधिवेशन गरेको थियो। विधानअनुसार नियमित महाधिवेशन गत वर्ष कात्तिक १८ गतेभित्रै गर्नुपर्ने थियो।
तर अध्यक्ष लिङ्देनले विधानको व्यवस्थाअनुसार केन्द्रीय कार्यसम्पादन समितिबाट ६ महिनाका लागि कार्यकाल थपेका थिए। उक्त म्याद जेठ १८ मा सकिएको थियो। थपिएको म्याद सकिएपछि बसेको केन्द्रीय समिति बैठकले महाधिवेशन मिति तय गरेको हो।
महाधिवेशन मिति तय गर्ने केन्द्रीय समिति बैठकमा पूर्वअध्यक्षहरू पशुपति शम्शेर राणा, कमल थापा र प्रकाशचन्द्र लोहनीलगायत केही नेताहरू अनुपस्थित थिए।
यद्यपि अध्यक्ष लिङ्देनले 'राप्रपा पूर्ण रूपले महाधिवेशनमा होमिएको छ। कुनै पनि तर्क र बहानामा नअल्झिकन महाधिवेशनको प्रक्रियामा सहभागी हुन सबै नेता कार्यकर्ता साथीहरूलाई अपिल गर्दछु’ भनेका छन्।
प्रवक्ता मोहन श्रेष्ठका अनुसार महाधिवेशन मंसिर २६, २७ र २८ गते काठमाडौंमा हुनेछ।
‘केन्द्रीय महाधिवेशनलाई सफलतापूर्वक सम्पन्न गर्न अध्यक्ष राजेन्द्र लिङ्देनको अध्यक्षतामा महाधिवेशन मूल आयोजक समिति गठन गरिएको छ। समितिमा पार्टीको केन्द्रीय कार्यसम्पादन समितिका सदस्यहरू, पदाधिकारी एवं केन्द्रीय समितिका सदस्यहरू, सल्लाहकार समितिका अध्यक्ष तथा सदस्य, विभिन्न केन्द्रीय विभागका प्रमुख, प्रदेश अध्यक्ष, सबै जिल्ला अध्यक्ष, प्रतिनिधिसभा र प्रदेशसभाका सांसद, सबै भातृ संगठनका अध्यक्ष सदस्य रहनेछन्। पार्टीको केन्द्रीय कार्यसम्पादन समितिको बैठकले आवश्यकता अनुसार विभिन्न उपसमिति गठन गर्नेछ,’ बैठकपछि उनले जारी गरेको विज्ञप्तिमा उल्लेख छ।
बैठकमा प्रस्तुत विभिन्न प्रतिवेदनहरूलाई परिमार्जनसहित पारित गरिएको पनि उनले बताए।
‘केन्द्रीय निर्वाचन समितिले पेस गरेको सक्रिय सदस्यता वितरण निर्देशिका, सांगठनिक तह निर्वाचनसम्बन्धी नियमावली र पार्टीको निर्वाचन निर्देशिका पारित गरिएको छ,’ उनले भने, ‘जसअनुसार आगामी भाद्र मसान्तभित्र जिल्ला अधिवेशन सम्पन्न गर्ने। भाद्र मसान्तसम्म जिल्ला अधिवेशन गर्ने जिल्ला मात्र केन्द्रीय महाधिवेशनमा सहभागी हुन योग्य हुनेछन्।’
उनकाअनुसार आगामी असोज १५ देखि असोज २४ गतेसम्म सातवटै प्रदेशको प्रदेश अधिवेशन सम्पन्न गर्ने निर्णय भएको छ।
पार्टीको सक्रिय सदस्यता वितरण कार्यलाई आगामी भाद्र मसान्तसम्म अभियानको रुपमा चलाउने र भाद्र मसान्तसम्म सक्रिय सदस्यता प्राप्त गरेका मात्र महाधिवेशन प्रतिनिधिको मतदाता तथा उमेदवार हुन पाउने निर्णय केन्द्रीय समितिले गरेको हो।
कार्तिक ११ गतेदेखि कार्तिक ३० गतेसम्म सबै जिल्लाको सबै प्रदेशसभा क्षेत्रीय निर्वाचन समितिले पार्टीको विधान बमोजिम सक्रिय सदस्य मध्येबाट केन्द्रीय महाधिवेशन प्रतिनिधि छनौट गरी मंसिर ७ गतेभित्र केन्द्रीय निर्वाचन समिति र पार्टी केन्द्रीय सचिवालयमा पठाउनुपर्ने निर्णय राप्रपाको छ।
प्रदेशसभा निर्वाचन क्षेत्रबाट महाधिवेशन प्रतिनिधि चयन गर्दा युवा प्रतिनिधित्व सुनिश्चित गरिनुपर्ने व्यवस्था गरिएको प्रवक्ता श्रेष्ठले जानकारी दिए।
साथै बैठकले नेपाल सरकारले ल्याएको ०८३/८४ को बजेटमा शिक्षा, स्वास्थ्य र विद्युत जस्ता नागरिकका आधारभूत विषयमा समेत लगाइएको अनुचित कर फिर्ता लिन माग गर्ने निर्णय गरेको छ।
दैनिक उपभोग्य वस्तु तथा निर्माण सामग्रीको आकासिएको मूल्यवृद्धिबाट आम जनताको जीवनयापन दिनानुदिन कठिनतम बन्दै गइरहेको वर्तमान अवस्थालाई ध्यान दिइ जनताको जीवनयापन सहज बनाउन तत्काल मूल्यवृद्धि नियन्त्रण एवं बजारको प्रभावकारी अनुगमन गर्न राप्रपाले सरकारसँग माग गरेको हो।
वैकल्पिक आवास, पुनर्स्थापनाको योजना र समयमै उचित सूचना नदिई काठमाडौंका नदी किनारका भूमिहीनहरूको बस्तीमा डोजर प्रयोग गरी हटाइएको भन्दै राप्रपाले बृद्धवृद्धा, अशक्त, अपाङ्गता भएका, सुत्केरी महिला र बालबालिकाको न्यूनतम मानव अधिकारको पनि ख्याल नगरिएकोमा आपत्ति जनाएको छ। विस्थापित वास्तविक भूमिहीनहरुलाई यथाशीघ्र व्यवस्थित पुनर्बासको व्यवस्था गर्न राप्रपाले माग गरेको हो।
राप्रपाले चिया क्षेत्रमा देखिएको समस्या समाधानका लागि तत्काल पहल गर्न सरकारको ध्यानाकर्षण गराएको छ।
धान रोपाइँको मुख्य सिजन सुरू भए पनि देशभरका किसानले सहज र पर्याप्त रासायनिक मल पाउने व्यवस्था मिलाउन र मौज्दातमा रहेको मलको वितरण प्रणालीलाई व्यवस्थित गर्न, किसानले भोग्नु परिरहेको समस्यामा गम्भीर बन्न तथा रासायनिक मलको सहज आपूर्तिको व्यवस्था गर्न राप्रपाले सरकारको ध्यानाकर्षण गराएको प्रवक्ता श्रेष्ठको भनाइ छ।
