प्रधानमन्त्री बालेन्द्र शाहले राष्ट्रिय स्वतन्त्र पार्टी (रास्वपा)को प्रथम महाधिवेशनमा सम्बोधन गरेका छन्।
आइतबार चितवनको गेस्ट हाउस चउरमा आयोजित प्रथम महाधिवेशनमा सहभागी हुँदै प्रधानमन्त्री शाहले सरकारका कामकारबाही माथि उठेका प्रश्नबारे सम्बोधनको क्रममा जबाफ दिए।
उनले सुरूमा आफूले नबोल्ने भने पनि बोल्ने दिन आउने गरेको बताए।
कार्यक्रमलाई सम्बोधन गरेका एमाले नेता प्रदीप ज्ञवालीले सरकार एक्सिलेटर मात्र थिच्दा दुर्घटना हुन सक्ने भएकाले ब्रेक लगाउन पनि आवश्यक हुने भन्दै चिन्ता व्यक्त गरेका थिए।
'त्यस्तो चिन्ता चाहिँ लोकल रोडहरुमा हिँडेको गाडी भयो भने लिनुपर्छ। कहिले घुम्तिमा गाडी आउँछ कहिले दायाँ बायाँबाट आउँछ। हाम्रो गाडी लोकल रोडमा हिँडेको गाडी होइन। एक्सप्रेस-वेमा हिँडेको गाडी हो। गन्तव्यमा पुगेपछि मात्रै ब्रेक लाग्छ। गन्तव्यमा पुग्नुभन्दा अगाडि ब्रेक लगाउन जरूरी हुँदैन। हाम्रो गाडी अनियन्त्रित पनि छैन। वातावरण पनि मिलेर गएको छ,' उनले भने।
जनताको भोट हावाजस्तै हुने र कहिले पूर्व र कहिले पश्चिमबाट बग्न सक्छ भन्नेलाई पनि प्रधानमन्त्री बालेनले जबाफ दिए।
उनले रास्वपाले हावा परिवर्तन नभई बाढी ल्याएर खोला नै परिवर्तन गरेको बताए।
'जनताको भोट भनेको हावाजस्तो हुन्छ। कहिले यताबाट बग्छ कहिले उताबाट चल्छ भनेर चिन्ता लिनुभएको छ। हामीले बाढी ल्याएर खोला फर्काएका हौं। खोला एक पटक आफ्नो सहि बाटोमा फर्किएपछि निरन्तर त्यही बाटोमा बगिरहन्छ। हावाजस्तो पूर्व-पश्चिम बग्दैन। चिन्ता लिनुपर्दैन,' उनले भने।
त्यसैगरी पछिल्लो समय अख्तियार दुरूपयोग अनुसन्धान आयोगका पदाधिकारीहरूलाई प्रधानमन्त्री तथा मन्त्रिपरिषदको कार्यालयमा ‘थुनेर’ राहदानी विभागका महानिर्देशक तीर्थराज अर्याललाई पक्राउ गर्न लगाएको विषयमा सरकारको आलोचना भएको थियो।
यो विषयमा उनले सरकारले निहुँ नै खोज्न परे अख्तियारसँग ५ वर्षसम्म पनि राखेर सल्लाह र सोधपुछ गरिने बताएका हुन्।
‘...त्यो निहुँ खोज्दै गर्दा अख्तियारलाई ५ घण्टा सोधपुछ गर्न पर्छ, सरसल्लाह लिन पर्छ भने ५ घण्टा मात्रै होइन, हामी ५ वर्ष गर्छौं। ५ वर्षै अख्तियारलाई राखेर सरसल्लाह गरिन्छ। त्यसमा चिन्ता लिइराख्न पर्दैन,’ उनले भने।
उनले सरकारको सम्पत्ति दोहन भएको घटनाहरूमा निहुँ खोजिने बताए।
‘हाम्रो पार्टीले निहुँ खोज्नै परे कस्तो केशमा भने विगतमा फटाइँ भएको छ भने। सरकार सम्पत्तिको दोहन, सरकारी रकमको दोहन भएको छ भने त्यहाँ निहुँ खोज्छौं,’ उनले भने।
यस कामका लागि सामाजिक सञ्जालमा सरकार अनियन्त्रित देखिएको भए पनि नियम कानुन नमिचिने बताएका हुन्।
‘नियम कानुनमा बसेरकै काम गर्छौं। नियम भन्दा बाहिर जाँदैनौं। हाउभाउ हेर्दा अलिकति सोसल मिडिया, मिडिया हेर्दाखेरि अलिकति अनियन्त्रित देखिएला। त्यो देखिएको मात्रै हो। सबै चिज नियन्त्रित नै छ। कुनै चिज आउट अफ कन्ट्रोल गएको छैन,’ उनले भने।
उनले सीमा सम्बन्धमा आफ्नो अभिव्यक्तिलाई लिएर चिन्ता नगर्न पनि भनेका छन्।
'हामी हाम्रो छिमेकीसँग आफै कुरा गरेर मिलाउँछौं। हामीसँग प्रमाण छ। हामी ल्याउँछौं। त्यो कुरा ल्याउँछौं। यसमा आशंका मान्नुपर्दैन। मेरो राष्ट्रियताप्रति कुनै आशंका मान्नुपर्दैन। कसैले मान्नुपर्दैन,' उनले भने।
भारतसँग सीमा विवादको समाधानका लागि सरकारले बेलायतको मध्यस्थता नखोजेको पनि उनले बताए।
'ब्रिटिशले राज गर्दाको प्रमाण ल्याउनुपर्छ भने ल्याउँछौं भनेका हौं। ब्रिटिशलाई मध्यस्थकर्ता राख्न खोजेका होइनौं,' उनले भने।
पूरा भिडिओ:
