नेकपा एमालेसँग संसद र सडक दुवै मोर्चामा मिलेर अघि बढ्ने सार्वजनिक अभिव्यक्ति दिएका नेपाली कम्युनिस्ट पार्टी (नेकपा) संयोजक पुष्पकमल दाहाल 'प्रचण्ड' आइतबार एमाले अध्यक्ष केपी शर्मा ओलीसँग एउटै कार्यक्रममा सहभागी हुने भएका छन्।
मदन भण्डारीको ७५औं जन्म जयन्तीका अवसरमा आइतबार काठमाडौंमा आयोजना हुन लागेको विचार गोष्ठीमा यी दुई पूर्वप्रधानमन्त्री लामो समयपछि एक साथ देखिँदै छन्।
मदन भण्डारी फाउन्डेसनले प्रदर्शनी मार्गस्थित राष्ट्रिय सभागृहमा 'नेपालको कम्युनिस्ट आन्दोलन र जननेता मदन भण्डारी' विषयक विचार गोष्ठी आयोजना गर्न लागेको हो।
पूर्वराष्ट्रपति विद्यादेवी भण्डारी प्रमुख अतिथि रहने यो कार्यक्रममा ओली र प्रचण्ड सँगसँगै नेकपामा सह-संयोजक माधव कुमार नेपाल, नेता झलनाथ खनाल लगायत पनि सहभागी हुँदै छन्।
त्यस्तै, जनता समाजवादी पार्टी (जसपा) नेपालका अध्यक्ष उपेन्द्र यादव पनि सहभागी हुने कार्यक्रम छ।
प्रचण्डले सँगसँगै अघि बढ्ने भनेर अभिव्यक्ति दिएलगत्तै उनी र ओली एकसाथ सार्वजनिक मञ्चमा देखिने यो कार्यक्रमलाई चासोका साथ हेरिएको छ।
प्रचण्डले शुक्रबार विराटनगरमा आयोजित कोशी प्रदेश कमिटीको एकता बैठक तथा प्रशिक्षण कार्यक्रमलाई सम्बोधन गर्दै संसद र सडक दुवै मोर्चामा एमालेसँग मिलेर अघि बढ्ने बताएका थिए।
'अहिलेको परिस्थितिमा संसदमा बलियो उपस्थिति जनाउन र सडक आन्दोलनलाई सशक्त बनाउन पनि एमालेसँगको सहकार्य अनिवार्य भइसकेको छ,' उनको भनाइ थियो।
तत्कालै पार्टी एकताको सम्भावना नरहे पनि सहकार्यको वातावरण बनिसकेको र यो कुरा छलफलबाट निष्कर्षमा पुगेको उनको भनाइ थियो।
आफ्नो राजनीतिक यात्रामा 'क्रमभंग' गरिरहने स्वभावलाई स्मरण गर्दै दाहालले आगामी महाधिवेशनबाट फेरि नयाँ क्रमभंग हुने उद्घोष पनि गरेका थिए।
उनले यसलाई आफ्नो जीवनको 'अन्तिम क्रमभंग' भन्दै यसका लागि कार्यकर्ताहरूलाई तयार रहन आग्रह गरेका थिए।
