श्रम संस्कृति पार्टीका सांसद आरेन राईले गरिब निमुखाको निम्ति काम गर्छु भनेर आएको सरकारले गरिबहरूलाई निमोठ्ने काम गरिरहेको बताएका छन्।
प्रतिनिधिसभाको मंगलबारको बैठकमा उनले भने, 'गरिब निमुखाको निम्ति काम गर्छु भनेर आएको यो सरकारले गरिबमाथि धारे हात लगाएर निमोठ्ने काम गरेको छ। सुकुम्बासीको सवालमा होस् वा पठाओ राइडरको सवालमा होस् वा साना व्यवसायीहरूको सवालमा होस्, सरकारले गरिबहरूलाई निमोठ्ने काम गरिरहेको छ।'
उनले प्रधानमन्त्री बालेन शाहको सीमा सम्बन्धी अभिव्यक्ति संसदको रेकर्डबाट हटाउनुपर्ने माग पनि दोहोर्याए।
'ढुंगा बोल्छ तर मान्छे बोल्दैन। हामीले लगातार माग गर्दा पनि प्रधानमन्त्रीज्यूले सीमासम्बन्धी अभिव्यक्ति सच्याउनुभएको छैन,' उनले भने, 'उहाँले मेयर हुँदा सिंहदरबार जलाइदिन्छु भनेर फेसबुकमा अभिव्यक्ति दिनुभयो। त्यसको केही समयमा सिंहदरबार जल्यो। भोलि हाम्रो सीमा पनि साँच्चिकै छिमेकी मुलुकले मिच्ने त होइन भन्ने होइन भन्ने मलाई डर लागेको छ।'
सर्वोच्च अदालतको आदेश विपरीत हजारौं करार तथा ज्यालादारी कर्मचारीको हित प्रतिकूल हुने गरी उनीहरूलाई जागिरबाट निकालेर बेरोजगार बनाउने काम गरिरहेको पनि उनले बताए।
