नेकपा एमालेले प्रहरीले नियन्त्रणमा लिएका अनेरास्ववियुका अध्यक्ष दीपक धामी सहितका विद्यार्थी नेताहरूलाई तत्काल रिहा गर्न माग गरेको छ।
महासचिव शंकर पोखरेलले बुधबार प्रेस वक्तव्य जारी गर्दै महँगीविरूद्ध प्रदर्शनमा ओर्लिएका विद्यार्थीहरूमाथि दमन भएको भन्दै घटनाको निन्दा गरेका छन्।
‘मुलुकमा व्याप्त आकासिँदो मूल्यवृद्धि, सुकुम्बासी नागरिकहरूमाथिको अत्याचार र शृङ्खलाबद्ध राज्य आतंकका विरूद्ध जनसरोकारका मुद्दा उठाई सिंहदरबार गेट अगाडि शान्तिपूर्ण प्रदर्शनमा उत्रिएका विद्यार्थीहरूमाथि सरकारले गरेको बर्बर दमन र गिरफ्तारीप्रति पार्टीको गम्भीर ध्यानाकर्षण भएको छ,’ महासचिव पोखरेलले भनेका छन्।
सरकार आफैले भिजिलान्ते शैलीमा राजधानीका सञ्चार गृह, राजनीतिक नेता र व्यवसायीका निवास एवं कार्यालयहरूमा गाडी पार्किङ गराई राज्य संरक्षित अवरोध सिर्जना गरेको आरोप पनि पोखरेलले लगाएका छन्।
सोही ‘अराजक घटनाको सांकेतिक विरोध गरिरहेका’ अनेरास्ववियुका केन्द्रीय अध्यक्ष दीपक धामीसहित विद्यार्थी नेताहरू जित सिटौला, सुदीप थापा, विशाल खड्का, रवि मगर, विष्णु उपरकोटी र शिरीष बुढाथोकीलाई प्रहरीले बलपूर्वक गिरफ्तार गरेको एमालेको भनाइ छ।
‘नागरिकको शान्तिपूर्ण प्रदर्शन र अभिव्यक्ति स्वतन्त्रताको संवैधानिक हकलाई कुण्ठित गर्दै सरकारले देखाएको यो कायरतापूर्ण रवैया लोकतन्त्र र मानव अधिकारको ठाडो उल्लंघन हो,’ पोखरेलले भनेका छन्, ‘हाम्रो पार्टी सरकारको यस अधिनायकवादी कदमको कडा शब्दमा निन्दा र घोर भर्त्सना गर्दछ।’
एमालेले गिरफ्तार गरिएका अनेरास्ववियुका अध्यक्ष धामीसहित सातै जना विद्यार्थी नेताहरूलाई तत्काल र बिनासर्त रिहा गर्न सरकारसँग माग गरेको छ।
